काठमाडौं । क्यान्सर पीडित इन्द्रकुमारी नेम्वाङको स्वास्थ्य उपचारका लागि देश-विदेशबाट संकलित ८ लाख ३१ हजार रुपैयाँ  हस्तान्तरण गरिएको छ ।

बेलायतबाट पुनम नेम्वाङ र नेपालमा भूपेन्द्र वनेमको स‌ंयोजनमा बेलायत, हङकङ, कोरिया, मलेसिया, नेपालमा रहेका आफन्तजन, इस्टमित्र, साथीभाइहरुबाट सामाजिक सञ्‍जालको माध्यमबाट संकलन गरिएको उक्त रकम स्वयम्‌ बिरामी इन्द्रकुमारी नेम्वाङ्गको निजी निवास काठमाडौंमा गई मंगलबार हस्तान्तरण गरिएको हो ।

पाँचथर मिक्लाजुङ गाउँपालिका वडा नं १ स्याथी घर भएकी इन्द्रकुमारी नेम्वाङ्गको श्रीमान् प्रेमराज आङदेम्बे आजभन्दा ७ वर्षअगाडि वैदेशिक रोजगारका लागि साउदी अरब गएको ६ महिना नबित्दै सुतेको सुत्यै भएर मृत्यु भयो । उनकी ११ वर्षका छोरा र ८ वर्षकी छोरी छन् । घरासयी आर्थिक अवस्था पनि अति कमजोर भएको आफ्ना नाबालक सन्तान हुर्काउने क्रममा इन्द्रकुमारी विगत २ वर्षअघिदेखि ब्लड क्यान्सरबाट पीडित भई उपचाररकै क्रममा अहिलेको बोन्म्यारो ट्रान्सप्लान्ट गर्नुपर्ने र त्यसको लागि १५ लाख लाग्ने अस्पतालले जनाएपछी आर्थिक सहयोग संकलन अभियान चलाइएको हो ।

हस्तान्तरण कार्यक्रममा Dio Media का सञ्‍चारकर्मी दिपक राईले फेसबुकमार्फत् फेसबुक लाइभ प्रसार गरेर सार्वजनिक गरेका थिए कार्यक्रममा मातृका नेम्वाङ, नरेश वनेमको उपस्थिति रहेको थियो ।

सञ्चारकर्मी राईले सम्पूर्ण सहयोगदाताहरुको नाम पढेर सुनाएका थिए भने अभियन्ता भूपेन्द्र वनेम, पुनम वनेम,सहयोगीद्वय मातृका नेम्वाङ र नरेश वनेमले सबै सहयोगदाताहरुलाई धन्यवाद ज्ञापन गरेका थिए ।

क्यान्सर पीडित इन्द्रकुमारी नेम्वाङले पनि सम्पूर्ण सहयोगदाताहरुलाई धन्यवादसहित हार्दिक आभार प्रकट गरेका थिए ।