काठमाडौं । नेपाल र नेपालीको सान विश्वकै सर्वोच्च शिखर सगरमाथा (चोमोलुङ्मा)को उचाइ ८६ सेन्टिमिटर बढेको छ । सर्वाधिक चासोको रुपमा नेपाली जनताले लिएको सगरमाथाको नयाँ उचाई नेपाल र चीनले एकैपटक मंगलबार सार्वजनिक गरेको हो ।

अब सगरमाथाको उचाइ अब ८८४८.८६ मिटर पुगेको छ । नापी विभागमा आयोजित पत्रकार सम्मेलनमा परराष्ट्रमन्त्री प्रदीपकुमार ज्ञवालीले नयाँ उचाइ घोषणा गरेसँगै यसले मान्यता पाएको बताएका छन् ।

यद्यपी उचाइ मापन भने नेपाल र चीनले बेग्लाबेग्लै गरेको हो । फिल्ड सर्वेक्षणबाट प्राप्त तथ्यांक नापी विभागले प्रशोधन गरेर चिनीयाँ समकक्षी प्राविधिक र निर्देशक समिति तहमा नै छलफल गरेको सार्वजनिक गरिएको विभागले जनाएको छ ।

गत मंसिर १० मा बसेको संघीय मन्त्रिपरिषद् बैठकले भूमि व्यवस्था, सहकारी तथा गरिबी निवारण मन्त्रालयलाई उचाइ सार्वजनिक गर्न स्वीकृति दिएको हो तर चीनसँग समन्वय भने परराष्ट्रय मन्त्रालयले गरेको थियो ।

हालसम्म विश्वले मान्दै आएको उचाइ ८८४८ मिटर सर्वे अफ इन्डियाले सन् १९५४ मा नापेको हो । सगरमाथाको उचाइबारे विवादित अवस्थामा पुगेपछि नेपाल र चीनबीच ८८४८ मिटरलाई नै मान्यता दिने साझा धारणा बनेर हालसम्म सोही उचाइलाई कायम गरिएको थियो । त्यसपछि सन् २०१९ को अक्टोबरमा सगरमाथाको उचाइ नाप्न नेपाल र चीनमा एकै साथ घोषणा गर्ने सहमति भएको थियो ।

आदिवासी किरात राईहरुले सगरमाथाको ऐतिहासिक नाम चोमोलुङ्मा मान्छन् । सन् १८६५ मा ब्रिटिस सर्भेयर कर्णेल सर जर्ज एभरेष्टको नाममा माउन्ट एभरेष्ट नामाकरण गरिएको थियो । त्यस पछि सन् १९५६(वि.सं. २०१२) मा इतिहास शिरोमणि बाबुराम आचार्यले सगरमाथा नामाकरण गरेका हुन् ।