उर्लाबारी। मोरङ् उर्लाबारी दश विघेमा धिमाल जातीहरुको जातीय संस्था धिमाल जातीय विकास केन्द्रको छैटौं राष्ट्रिय महाधिवेशन आजबाट प्रारम्भ भएको छ । दुई दिनसम्म चल्ने महाधिवेशनको उद्घाटन प्रदेश नं. १ का आन्तरिक मामिला तथा कानून मन्त्री हिक्मत बहादुर कार्कीले गरेका हुन् ।

धिमाल जातीको पहिचान राष्ट्रको शान, धिमाल स्वायत्त क्षेत्र प्राप्ति हाम्रो अभियान मूल नारा दिईएको उक्त उद्घाटन शत्रमा नेपाल आदिवासी जनजाति महासंघका महासचिव नित्यानन्द ताजपुरियाले जातीय संस्थाहरु बिचको आपसी एकतालाई मजबुत बनाउँदै लानु पर्ने कुरामा जोड दिएका थिए । कार्यक्रममा पथरीशनिश्चरे नगरका प्रमुख दिलिप राई त्यसैगरी उर्लाबारी नगरका प्रमुख खड्ग फागोले समेत कार्यक्रमलाई बधाई तथा शुभकामना व्यक्त गरेका छन् ।

आजको उद्घाटन सत्र कार्यक्रममा विकास केन्द्रका सल्लाहकार संयोजक रामबहादुर धिमाल, सल्लाहकार मोहन धिमाल त्यसैगरी संस्थापक पृती धिमाल लगायतको उपस्थिति रहेको थियो । कार्यक्रम तेजबहादुर धिमालको अध्यक्षता र महासचिव केदार धिमालको संचालनमा उद्घाटन सत्र कार्यक्रम सम्पन्न भएको छ । उद्घाटन सत्रकै दिन आज धिमाल युवा तथा खेलकुद मञ्चले रक्तदान कार्यक्रम समेत गरेको छ ।

तस्वीरः केदार धिमालकाे फेसबुकबाट