विराटनगर। १ नं. प्रदेशमा कोरोना भाइरसको दोश्रो लहर सुरु भएयता १०६ जना संक्रमितले ज्यान गुमाएका छन् । गएको वैशाख १ यताबाट विभिन्न कोभिड अस्पताल एवम् होम आइसोलेसनमा उनीहरुको मृत्यु भएको हो ।

प्रदेशको सामाजिक विकास मन्त्रालयको तथ्याङ्क अनुसार पछिल्लो एक सातायता प्रदेशमा दैनिक ८ जना संक्रमितले ज्यान गुमाउँदै आएको जनाएको छ । कोभिड अस्पतालहरूका अनुसार पनि वैशाख महिनाको अन्तिम साता मृत्युदर अत्याधिक बढेको जनाएको छ । मन्त्रालयको अभिलेख अनुसार सोमबार मात्रै एकैदिन ११ जना संक्रमितको विभिन्न अस्पतालहरुमा उपचारका क्रममा मृत्यु भएको छ ।

आज मात्रमात्रै प्रदेश १ का विभिन्न अस्पतालहरुमा थप १२ जनाले ज्यान गुमाएका छन्।

मन्त्रालयका अनुसार कोरोनाको दोस्रो लहर सुरु भएपछि बैशाख ३ मा पहिलो एक जनाको मृत्यु भएको थियो । त्यसयता बैशाख २१ देखि दैनिक मृत्युदर ८ जना रहेको जनाएको छ ।

१ नं. प्रदेशमा हालसम्म कोरोना भाइरसबाट मृत्यु हुनेको संख्या भने ५७७ रहेको छ । जसमध्ये यस प्रदेशमै स्थायी ठेगाना भएका मृतकको संख्या ५२९ पुगेको मन्त्रालयले जनाएको छ ।