लिम्बुवानखबर। नेपालमा कोभिड–१९ तिब्र गतिमा फैलिएपछि त्यसलाई मद्दत गर्न मध्यपूर्वी खाडी मुलुकमा रहेका नेपालीहरुले ६ सय थान अक्सिजन सिलिण्डर खरिद गरेका छन् । प्रतिसिलिण्डर ४० लिटर अक्सिजन अट्ने ६ सय थान सिलिण्डर खरिद प्रक्रिया सकिएको ओमानस्थित गैरआवासीय नेपाली सोसल क्लव (एनआरएन) का अध्यक्ष विकल झाले अनलाईनखबरलाई बताए ।

खाडी मुलुकका सबै नेपालीको स्वतस्फूर्त आर्थिक सहयोगबाट सिलिण्डर खरिद सकिएको र आइतबारसम्म नेपाल पठाउनेगरी तयारी भईरहेको झाले जानकारी दिए । अक्सिजन सिलिण्डर नेपाल पठाउनका लागि मस्कटस्थित दूतावाससँग समन्वय भइरहेको छ— उनले भने । आइतबारसम्म सिलिण्डर नेपाल पु¥याउने गरी काम भइरहेको उनले बताए ।

करिब ७५ लाख नेपाली रुपैयाँ बराबरको सो अक्सिजन सिलिण्डर नेपाल पठाउन लागिएको झाले जानकारी दिए । गैह्र आवासीय नेपाली संघ (एनआरएन) को अन्तर्राष्ट्रिय समन्वय समितिले नेपालमा सिलिण्डर पठाउन आर्थिक स्रोतको कमी हुन नदिने बताएका छन् । यद्यपी सिलिण्डरको रकम सकेसम्म खाडीमा रहेका एनआएनएमार्फत नै तिर्ने गरी काम अघि बढाइएको उनले बताए ।

अक्सिजन अभावमा जनताले मृत्युवरण गरेका समाचारले खाडीमा रहेका नेपाली आक्रान्त भनेपछि स्वतस्फूर्त रुपमा सहयोगका अपिलहरु सुरु भएको थियो । खाडी मुलुकमा रहेका नेपालीले खरिद गरेको अक्सिजन सिलिण्डर नेपाल पठाउन परराष्ट्र मन्त्रालयमार्फत सहजीकरण गरिररहेको ओमानस्थित नेपाली दूतावासले जनाएको छ । सिलिण्डर नेपाल पाठउन के कसरी सकिन्छ भन्नेबारे नेपाल अ्एयरलाइन्ससँग कुराकानी भइरहेको ओमानका लागि नेपाली राजदूत शर्मिला पराजुली ढकालले बताइन् ।

‘अक्सिजन सिलिण्डर खरिद सकिएको छ, हामी जतिसक्दो छिटो नेपाल पठाउन परराष्ट्र मन्त्रालयमार्फत नेपाल एयरलाईनसमार्फत पेपर वर्क गरिरहेका छौं,’ राजदूत ढकालले भनिन् । सकेसम्म नेपाल एयरलाइन्सको जहाजमा एकै पटक ६सय सिलिण्डर पठाउन सकिने गरी छलफल भइरहेको उनले बताइन् ।