दमक/झापाको दमकमा आज (बिहिबार) थप ८८ जनामा कोरोना संक्रमण पुष्टि भएको छ । जिल्ला स्वास्थ्य कार्यालय झापाका अनुसार दमकमा ३४ महिला र ५४ पुरुषसहित जिल्लाका विभिन्न स्थानीय तहमा कूल २७६ जनामा संक्रमण पुष्टि भएको हो ।

यससंगै झापामा सक्रिय संक्रमितको संख्या २ हजार ३ सय ३० जना पुगेको उल्लेख छ । त्यसैगरी आज जिल्लामा ५ जनाको मृत्यु भएको छ । एन्टिजेन परिक्षणबाट संक्रमण पुष्टि भएका ३ जना र पीसिआर परिक्षण मार्फत संक्रमण पुष्टि भएका गौरीगञ्ज ६ का एक जना र कन्काई ७ का एक जनाको संक्रमणका कारण मृत्यु भएको छ ।

दमकमा कोरोनाको संक्रमण तिब्र गतिमा फैलिएपछि नगरपालिकाले आगामी १ जेठ (शनिबार) देखि लागू हुने गरी पूर्ण रुपमा बन्द गर्ने तयारी गरेको जनाएको छ । नगरस्तरीय कोरोना रोकथाम तथा नियन्त्रण समन्वय समितिको बिहीबार बसेको बैठकले सो निर्णय गरेको नगर प्रमुख रोमनाथ ओलीले जानकारी दिए । उनले १ गतेदेखि दमकमा कुनै पनि व्यवसाय खोल्न र हिंडडुल आदि बन्द गर्ने बताए । वित्तिय संस्थाहरु सातामा दुई दिन मात्रै खुल्ने बताए ।

नयाँ भेरियन्टसहितको कोरोना संक्रमणका कारण दमकमा अहिले सम्म ८ जनाको मृत्यु भइसकेको छ भने ३ सय ५० बढी सक्रिय संक्रमित छन । दमकको अवस्था दिनानुदिन चिन्ताजनक भएपछि यस किसिमको कडाइँ गर्ने अवस्था सिर्जना भएको नगर उपप्रमुख गीता अधिकारीको भनाई छ ।