ताप्लेजुङ। ताप्लेजुङ जिल्लाले थप एक हप्ता निषेधाज्ञा जारी गरेको छ । जेठ २ गतेसम्मको निषेधाज्ञा सकिएपछि ३ गतेदेखि १० गते सम्म एक हप्ता निषेधाज्ञा थप गरिएको हो ।

दुई हप्तादेखि जारी निषेधाज्ञाको अवधि दोश्रो तेस्रो पटक थप गरिएको हो । जिल्लामा दिनानुदिन संक्रमण तिव्ररुपमा फैलिरहेकाले यसको रोकथाम र नियन्त्रणका लागि अवधि थप गरिएको प्रमुख जिल्ला अधिकारी उमेश पाण्डेले बताएका छन् ।

फुङलिङ नगरपालिका क्षेत्रको दोभान, हान्द्रुङ, दगुर्ने, थुम्बा, सिस्ने, फक्ताङलुङ गाउँपालिका ३ लिङ्खीम वारी फुरुम्बु क्षेत्र, सिकैचा वारी फावाखोला, सुकेटार आसपास, पाथीभरा याङ्वरक गाउँपालिका जाने बाटो, कामी डाँडा, काबेली खोला र मेरिङदेन गाउँपालिका भित्र समेत निषेधाज्ञा लागु हुने जिल्ला प्रशासनले जनाएको छ ।

सदरमुकाममा संक्रमण बढेसँगै संक्रमणबाट आफु बच्न र अरुलाई बचाउँन निषेधाज्ञालाई पुर्णरुपले पालना गर्न प्रशासनले अनुरोध समेत गरेको छ । अति आवस्यक बाहेकका काममा बाहिर हिडडुल नगर्न सर्वसाधरण सबैलाई अनुरोध गरिएको प्रजिअ पाण्डेले बताएका छन् ।