बिर्तामोड। कोरोना भाइरसबाट संक्रमित अर्जुनधारा नगरपालिकाका प्रमुख प्रशासकीय अधिकृत महेन्द्रकुमार खाम्याहाङको निधन भएको छ । स्वास प्रश्वासमा समस्या आएपछि उनको बिर्तामोडस्थित बिएन्डसी अस्पतालमा उपचार भइरहेको थियो ।

उनलाई वैशाख १० गते एन्टिजेन परीक्षण गर्दा संक्रमण पुष्टि भएको थियो ।लामो उपचार गरिरहँदा पनि उनको स्वास्थ्यमा सुधार आउन सकेको थिएन । उपचारकै क्रममा आज बिएन्डसी हस्पिटलमा निधन भएको हो ।

उनको निधनबारे झापाका प्रमुख जिल्ला अधिकारी श्रवणकुमार तिमल्सिनाले आज पुष्टि गरेका छन् । उनको २ बजेर ३० मिनेटमा निधन भएको प्रजिअ तिमल्सिनाले जानकारी दिए । उनको स्वास्थ्य सुधार नभएपछि वैशाख १७ गते थप उपचारका लागि बिएन्डसीमा भर्ना गरिएको थियो ।

प्रशासकीय अधिकृत खाम्याहाङ संक्रमणपछि केही दिन आफ्नै क्वाटरमा बसेका थिए भने २ दिन अर्जुनधारा नगरपालिकाले स्थापना गरेको आइशोलेसनमा बसेका थिए ।