मेचीनगर। संघीय लोकतान्त्रिक राष्ट्रिय मञ्च तथा संघीय लिम्बुवान मञ्च, नेपालका महासचिव यलम्बर खम्बू पितृशोकमा परेका छन् । महासचिव खम्बू र मञ्चका झापा जिल्ला उपाध्यक्ष अमित खम्बूका पिता कासमिर खम्बूको मंगलबार राती साढे ११ बजे ७१ बर्षको उमेरमा निधन भएको हो ।

विगत ६ बर्ष देखि पेटका बिरामी खम्बूको पाचनक्रियामा समस्या भएको थियो । नेपालमा प्रजातन्त्रको स्थापना भएकै ताका वि.सं. २००७ सालमा जन्मिएका खम्बू जातीय मुक्ति आन्दोलनमा झापाका एक खम्बा रहेका थिए । राष्ट्रिय जनमुक्ति पार्टीमा लामो राजनीति गरेका खम्बूको निधनले पहिचान, संघीयता, सह–अस्तित्व सहितको १०+१ प्रान्तीय स्थापनाका निम्ति लडिरहेकाको मञ्चलाई क्षति पुगेको मञ्चका सचिवालय सदस्य नन्दु मेन्याङ्बोले बताएका छन् ।

खम्बुका तीन छोराहरु महासचिव खम्बू, रामदेव खम्बू र जिल्ला उपाध्यक्ष अमित रहेका छन् भने एक छोरी कला राई छन् । महासचिव खम्बू कामको शिलशिलामा हाल काठमाडौंमा रहनुभएको हुँदा वहाँ आइपुगेपछि मृतक खम्बूको जातीय परम्परा अनुसार अन्तिम संस्कार गरिने नेता मेन्याङ्बोले बताएका छन् ।