लिम्बुवानखबर। सभामुख अग्निप्रसाद सापकोटाले शुक्रबार मध्यराती गरिएको संसद् विघटनलाई असंवैधानिक र अलोकतान्त्रिक भएको बताएका छन् ।
शनिबार वक्तव्य जारी गर्दै सभामुख सापकोटाले संसद विघटन ११ फागुनमा सर्वोच्च अदालतले गरेको फैसला विपरित भएको दाबी गरेका हुन् ।

जारी विज्ञप्तिमा भनिएको छ –‘फैसलामा ‘अन्य विकल्प हुँदाहुँदै कसैको इच्छा वा आत्मनिष्ट रुपमा देखेको आवश्यकताका आधारमा आवधिक चुनाव बाहेकको अवस्थामा जनतालाई समेत आर्थिक दायित्व पर्ने गरी प्रतिनिधिसभा विघटन गरिनु संविधानको मर्म र उद्देश्य नहुँदा त्यस्तो कार्य संविधानसम्मत हुँदैन भनेको स्मरणीय छ ।’

संविधानको धारा ७६ (५) अनुसार वैकल्पिक सरकार गठनका लागि वस्तुगत आधार पेश भइसकेको अवस्थामा प्रधानमन्त्री नियुक्त गर्ने विकल्प रहँदारहँदै संसद् विघटन गरिएको समेत सापकोटाले विज्ञप्तिमा उल्लेख गरेका छन् ।

विज्ञप्तिमा थप भनिएको छ –‘राष्ट्रपति कार्यालयबाट २०७८ जेठ ७ गते जारी विज्ञप्ति नेपालको संविधान, राजनीतिक दल सम्बन्धी ऐन २०७३ र प्रतिनिधिसभा नियमावली २०७५ ले गरेको व्यवस्थासँग मेल खाएको देखिंदैन । जुन शक्ति पृथकीकरण, सन्तुलन र नियन्त्रणको सिद्धान्त विपरीत हुन गएको छ ।’

सभामुख सापकाेटाले सबै नागिरक समाज, बुद्धिजिवी, पत्रकार, राजनीतिक दल, कानुनविद, सांसदसबैलाइ राष्ट्रिय हित, संवैधानिक सर्वाेच्चता र संघीय लाेकतन्त्र रक्षाकाे लागी एकजुट भएर अघि बढ्न अपिल समेत गरेका छन् ।

सभामुखद्वारा जारी विज्ञप्तिः