काठमाडौं । काम चलाउ सरकारले आज अध्यादेशमार्फत् आर्थिक वर्ष २०७८÷०७९ का लागि बजेट सार्वजनिक गर्दैछ । जेठ १५ गते बजेट पेश गर्नै पर्ने संवैधानिक व्यवस्था अनुसार अर्थमन्त्री विष्णु पौडेलले बजेट पेश गर्ने छन् ।

कोरोना महामारीको यो अवस्थामा कोभिड १९ संक्रमण नियन्त्रणलाई केन्द्रित गरेर सरकारले शनिबार सिंहदरबारबाट आगामी आर्थिक वर्ष २०७८÷७९ को वार्षिक अनुमानित आय–व्यय विवरण सार्वजनिक गर्न लागिएको हो ।

संसद भङ्गभएको अवस्थामा अध्यादेशमार्फत भए पनि बजेट ल्याउन लागेको सरकारले जिकीर गर्दा विपक्षी दल, पूर्व अर्थमन्त्रीहरु र अर्थविदहरुले प्रतिनिधि सभा विघटन गरिएको समयमा पूर्ण बजेट नल्याउन सरकारको ध्यानाकर्षण गराएका छन् । कामचलाउ सरकारले ल्याएको बजेटमा लोकप्रिय कार्यक्रम सार्वजनिक नगर्न समेत उनीहरुले सुझाएका छन् ।

अर्थमन्त्री पौडेलले आज दिउँसो ४ बजे बजेट सार्वजनिक गर्ने कार्यक्रम रहेकोे छ । बजेटको आकार सवा १६ खर्बको हुने बताइएको छ ।