दमक/किरात याक्खा छुम्मा झापाका संस्थापक अध्यक्ष हरिलाल देवानको ८४ वर्षको उमेरमा बिहीबार निधन भएको छ । केही बर्ष देखि पक्षघातका कारण अस्वस्थ देवानको बिहीबार बिहान ४ बजे निजी निवास दमक–८ किरात चोकमा निधन भएको हो ।
आज बिहीबार नकनकाईस्थित मुक्तिघाटमा धार्मिक परम्परा अनुसार अन्त्येष्ठी गरिएको छ । अन्त्यष्ठीमा देवानका कान्छा छोरा टीकाराज देवानले अन्तिम दागवत्ति दिएका थिए ।
त्यसअघि उनको पर्थिव शरीरमा किरात याक्खा छुम्माका पूर्व केन्द्रीय अध्यक्ष भूपालसिंह जिमीले छुम्माको झण्डा ओढाएर अन्तिम श्रद्धाञ्जलि व्यक्त गरेका थिए भने राष्ट्रिय जनमुक्ति पार्टीका नेता धनराज राईले पार्टीको झण्डा ओढाएर श्रद्धाञ्जली दिएका थिए ।
देवानले २०५३ सालदेखि २०७० सालसम्म याक्खा छुम्माको झापा जिल्ला अध्यक्षका रूपमा नेतृत्व प्रदान गरेका थिए । उनले राष्ट्रिय जनमुक्ति पार्टीको नगर उपाध्यक्षका रूपमा समेत लामो समय योगदान गरेका थिए । त्यस्तै दमकको किरात भवन, दमकको किरात चोक निर्माणमा समेत योगदान गरेका देवानले दमकमा विभिन्न सामाजिक क्षेत्रमा दशकौं समय योगदान दिएका उनको अब सम्झनामा मात्र रहेको छ ।
ब्रिटिस गोर्खा सैनिकका रूपमा दुई दशक बढी समय व्यतित गरेका देवानले ‘मेरो विगतलाई फर्केर हेर्दा’ जीवन संस्मरण पुस्तकसमेत प्रकाशन गरेका छन् । उनको पाँच छोरा र दुई छोरी छन् । देवानकी धर्मपत्नी देउमाया देवानको २०६३ सालमै निधन भएको थियो ।
Related