लिम्बुवानखबर, २५ जेठ । विपक्षी दलले प्रदेश २ को प्रदेशसभा बैठक अवरुद्ध गरेका छन् । आज (मंगलबार) बसेको प्रदेशसभाको बजेट अधिवेशनको दोस्रो बैठक विपक्षी दलहरुले अवरुद्ध गरेका हुन् ।

विपक्षी दलहरु नेपाली कांग्रेस, नेकपा एमाले र नेकपा माओवादी केन्द्रले स्थानीय तहमा जाने सशर्त अनुदान मनोमानी तरिकाले छनौट गरेको भन्दै बैठक अवरुद्व गरेका हुन् ।

बैठक प्रारम्भ हुनासाथ नेकपा एमालेका सांसद सुन्दरबहादुर विकले सांसदको सिफारिस र परामर्शमा सशर्त अनुदान स्थानीय तहमा पठाउनुपर्नेमा मनोमानी तरिकाले पठाइएको बताए । उनले यो निर्णय नसच्याएसम्म बैठक अवरुद्ध रहने बताए ।

कांग्रेस सांसद वीरेन्द्रकुमार सिंहले मनोमानी तरिकाले सशर्त अनुदानको योजना छनौट गरेको भन्दै नसच्याएसम्म बैठक अवरुद्व गरिरहने बताए । नेकपा माओवादी केन्द्रका सांसद रामकुमार यादवले पनि यसलाई सच्याउनुपर्ने बताए ।

प्रदेशमा पछिल्लो पटक कांग्रेस र माओवादीलाई पनि सरकारमा सहभागी हुने भनिएपनि अनुदानको योजनालाई लिएर विवाद देखिएको छ । मुख्यमन्त्रीले यसको जवाफ नदिएसम्म बैठक चल्न नदिने बताएका छन् ।