दमक/ झापाको दमकमा सरकारले तोकेको निषेधाज्ञा पालना नगरेको पाइएको छ । बिहिबार कोरोना परिक्षणका लागि पठाइएका मध्ये ४२.५० प्रतिशतमा कोरोना संक्रमण पुष्टि भएसँगै स्थानीयहरुले निषेधाज्ञा पालना नगर्नु नै मुख्य चुनौती भएको हो ।

नगरपालिकाले निशुल्क परिक्षणका लागि पठाइएका नमुनामध्ये सर्वसाधारणमा संक्रमण पुष्टि भएको हो । नगरपालिकाको स्वास्थ्य शाखाले कूल १४० जनाको स्वाव संकलन गरेर धरानस्थित वीपि कोइराला स्वास्थ्य विज्ञान प्रतिष्ठानमा पठाएको थियो । प्रतिष्ठानबाट आज शुक्रबार प्राप्त रिपोर्ट अनुसार ६० जनामा कोरोनाको दोश्रो भेरियन्ट पाइएको छ ।

नगरपालिकाको स्वास्थ्य शाखाका कुबेर भट्टराईका अनुसार संक्रमितहरुको विस्तृत तथ्याङक तयार पार्ने काम भइरहेको छ । जिल्ला प्रशासन कार्यालय झापाले जिल्लाभर करिब एक महिना अघिदेखि लगाएको निषेधाज्ञाका बीच गरिएको परिक्षणमा ठुलो संख्यामा संक्रमितहरु बढदै जानुलाई स्वास्थ्य सरोकारवालाहरुले गम्भिर चिन्ताको बिषयका रुपमा लिएका छन ।

दमक नगरपालिका क्षेत्रमा एक महिना अघिदेखि कोरोना रोकथाम तथा नियन्त्रणका लागि लगाइएको निषेधाज्ञा जारी छ । पछिल्लो समय थपिएको एक साताको निषेधाज्ञाको समय सकिनै लाग्दा दमकमा यस किसिमको चिन्ता बढेको हो । निषेधाज्ञाको पालनामा सर्वसाधारण सचेत नहुँदा कोरोना संक्रमण फैलिने क्रम रोकिन नसकेको स्वास्थ्य शाखाको निश्कर्ष रहेको छ ।