काठमाडौं, ११ असार। मस्तिष्कघात भएर अस्पताल भर्ना भएका साहित्यकार पूर्व कुलपति बैरागी काइँला (तिलविक्रम नेम्बाङ) को स्वास्थ्य अवस्था सुधारोन्मुख रहेको ओम अस्पतालले जनाएको छ । अस्पतालका जनसम्पर्क अधिकृत डा. विनोद अधिकारीका अनुसार कवि काइँलाको प्रारम्भिक रिपोर्टमा प्रेसर बढेर समस्या भएको देखाएको बताएका छन् ।

साहित्यकार काइँलाको होश आइसकेको हुँदा के कारण समस्या भएको हो त्यो बारे पत्ता लगाउन आइसियुमा राखेर उपचार गरिहेको अस्पतालले जनाएको छ । उपचारमा डा. विश्वनाथ कोइराला, न्यूरो डा. कृष्ण ढुंगाना लगायतको टोली खटिएको अस्पताप प्रशासनले जनाएको छ ।

बिहीबार राति ११ बजे घरमै बसिरहेको बेला चक्कर लागेर लड्न पुगेका काइँलालाई ओम अस्पताल ल्याइएको थियो । ८२ वर्षीय काइँलालाई पहिला देखि नै प्रेसर र नाकको रक्तश्राव समस्या रहेको छोरी नामओति नेम्बाङले बताएकी छिन् ।

थोरै कविता लेखर स्थापित नाम बनाएका काइँलाका बृहत लिम्बु नेपाली अंग्रेजी शब्दकोशका साथै लिम्बू संस्कृतिसम्बन्धी एक दर्जन अनुसन्धानमुलक पुस्तक प्रकाशित छन् । लोकतन्त्र घोषणापछि गठित नेपाल प्रज्ञा प्रतिष्ठानमा उनले पहिलो कुलपतिको जिम्मेवारीमा पाएका थिए ।