दमक, लिम्बुवानखबर। दमक नगरपालिकाले रतुवा नदीमा एकलौटी रुपमा तटबन्धन गरको भन्द्र जिल्ला समन्वय समितिद्वारा तत्काल तटबन्धन निर्माण नगर्न निर्देशन दिएको छ ।

नगरपालिकाले वडा नं. १ स्थित नमूना टोल पूर्वपट्टि रतुवाखोलामा अवैध रुपले तार जाली प्रयोग गरेर तटबन्धन निर्माण गरेका कारणले कमल गाउँपालिका वडा नंं ५ मा प्रत्यक्ष असर पर्न जाने भएको हुँदा तत्कालका लागि तटबन्धन निर्माण कार्य बन्द गर्न कार्यालयले नगरपालिकालाई निर्देशन दिएको हो ।

आगामी दिनमा तटबन्धन निर्माण गर्दा सम्बन्धित पालिकाका जनप्रतिनिधिको सहमतिमा मात्र बाँध निर्माण गर्ने व्यवस्था मिलाउन समेत समन्वय समितिले नगरपालिकालाई आदेश दिएको छ ।

रतुवा खोला दमक र कमलको बिचमा बग्ने भएको हुँदा तटबन्धन निर्माण पूर्व दुई पक्षका जनप्रतिनिधि बसेर समन्वय गर्नु पर्ने स्थानीयहरु बताउँछन् । बर्षामा थप क्षति रोक्नु पर्ने भएको हुँदा तत्काल निकास निकाल्न समेत स्थानीय सरकारसँग लुङधुङ टोलका सचिव पत्रकार डिल्लीश्वर मुहाङ्ले माग गरेका छन् ।