काठमाडौं, २६ असार । पछिल्लो समय कोरोना भाइरस संक्रमणबाट थप २१६९ जनामा पुष्टि भएको छ । स्वास्थ्य तथा जनसंख्या मन्त्रालयका अनुसार ६५३० पीसीआर परीक्षणमा १३५३ र ३८८७ एन्टिजेन परीक्षणमा ८१६ जना गरी २१६९ जनामा संक्रमण पुष्टि भएको हो ।

पछिल्लो २४ घण्टामा कोरोना संक्रमणबाट २२ जनाको मृत्यु भएको छ । योसँगै आज (शनिबार)सम्ममा मृतक संख्या ९ हजार ३६२ पुगेको छ । त्यसैगरी पछिल्लो २४ घण्टामा १४३२ जना संक्रमणमुक्त भएका छन् भने हालसम्म संक्रमणमुक्त हुनेको संख्या ६ लाख १८ हजार ३६१ जना पुगेको मन्त्रालयले जनाएको छ ।

कोरोना भाइरसको सक्रिय संक्रमितको संख्या पछिल्लो २४ घण्टामा २६ हजार ४८९ रहेको छ जसमध्ये २३ हजार ५३९ जना होम आइसोलेसनमा र २ हजार ९५० जना संस्थागत आइसोलेसनमा बसेका छन् ।

नेपालमा कोरोना भाइरस संक्रमितको कुल संख्या ६ लाख ५४ हजार २१२ पुगेको स्वास्थ्य तथा जनसंख्या मन्त्रालयले जनाएको छ ।