दमक, ८ साउन । नयाँ पुस्तासँगै आफ्नो जातीय परम्परागत मौलिक पोशाक संकटमा परेको भन्दै धिमाल जातीको पेटानी बुन्ने तालिम दिन थालिएको छ । संकटमा पर्दै गएको पेटानी बुन्ने तालिम धिमाल जाती विकास केन्द्रको अगुवाईमा धमाधम थालिएको हो ।

दमक १० स्थित सेतुमारीका बर्ष ३० की कमला धिमाललाई घिमाल महिलाले लगाउने परमम्परागत पोशाक पेटानी बन्न आउँदैन थियो । आफुमात्र होइन गाउँका धेरै नयाँ पुस्ताका महिलालाई पेटानी बुन्न जान्दैन थिए । यसरी घरमा बन्ने पेटानी बुन्न छाडेपछि पछिल्लो समय आवश्यक पेटानी बाहिरबाट आयात गर्नु परेपछि नयाँ पुस्ता समेत यस क्षेत्रमा आर्कषित भएको उनले बताइन् ।

धिमाल जातिय बिकास केन्द्रका अध्यक्ष लोकबहादुर धिमालले एकपछि अर्को गर्दै नयाँ पुस्ताले पेटानी बुन्न छाडेपछि आफ्नो मौलिक पेशा नै संकट पर्न थालेको बताउँछन् । उनले मौलिक पोशाक संरक्षण गर्न यस्ता तालिम सञ्चालन गर्नुका साथै वजारीकरणमा पनि सहयोग पुरयाँउदै आएको बताए ।

कमला जस्तै सोही स्थानकी सरस्वती धिमाल समेत पेटानी लगायतका कपडा बुन्न आउदैनथ्यो । पछिल्लो समय नयाँ पुस्ता बिद्यालयमा अध्ययनका लागि स्कुल, कलेज जाने र उनीहरुले पेटानी बुन्ने काममा रुचि नदिदा यो पेशा संकटमा पर्दै गएको थियो ।

यस्तै घिमाल समुदायमा अन्य जातीको प्रभावले गर्दा नयाँ पुस्ताका महिलालाई घिमाल जातीको मौलिक भेषभुषा समेत बिर्सने अवस्थामा पुगेको केन्द्रका अध्यक्ष धिमालको भनाई छ । पछिल्लो पुस्ताले आफनो भाषा तथा मौलिक भेषभुषा समेत बिर्सदै गएका थिए ।

दमक नगरपालिकाले धिमाल जातीलाई प्रथम नागरिक घोषणा गरेको छ भने सामुदायिक स्कुलमा धिमाल भाषाको कक्षा समेत संचालनमा ल्याएको छ । यसले धमालजातीहरुमा मौलिकता तर्फ फर्कनमा थप मद्दत पुगेको आदिवासी जनजाति समन्वय समितिका पूर्व अध्यक्ष मोहन धिमाल बताउँछन् ।