काठमाडौं, १४ साउन । आज देशभर ३,३६५ जना कोरोना संक्रमणबाट संक्रमित भेटिएका छन् । स्वास्थ्य तथा जनसंख्या मन्त्रालयका अनुसार ९ हजार ५५५ पीसीआर परीक्षणमा २३३५ जना र ४६८७ एन्टिजेन परीक्षणमा १०३० जना गरी ३३६५ जनामा संक्रमण पुष्टि भएको हो ।

कोरोना संक्रमणका कारण पछिल्लो २४ घण्टामा १६ जनाको मृत्यु भएको छ । त्यसैगरी आज १३७३ जना संक्रमणमुक्त भएका छन् ।

आज थपिएकासँगै नेपालमा कोरोना संक्रमितको कुल संख्या ६ लाख ९० हजार ३४२ पुगेको छ । ६ लाख ५० हजार ४४५ जना संक्रमणमुक्त भएका छन् भने ९ हजार ८०७ जनाको मृत्यु भएको छ ।

स्वास्थ्य मन्त्रालयका अनुसार हाल देशभर सक्रिय संक्रमितको संख्या ३० हजार ३९० जना रहेका छन् । जसमध्ये २७ हजार ३५५ जना होम आइसोलेसनमा रहेका छन् भने ३ हजार ३५ जना संस्थागत आइसोलेसनमा रहेका छन् । कोरोनाका बिरामीमध्ये ६३६ जना आईसीयू र १६० जना भेन्टिलेटरमा उपचाररत् छन् ।

पछिल्लो २४ घण्टामा सबैभन्दा धेरै झापामा ५९७ संक्रमित भएका छन् । यतिबेला झापाको १० वटा स्थानीय पालिकाहरुले पूर्ण निषेधाज्ञा लागू गरेका छन् ।