लिम्बुवानखबर। जापानको टोकियोमा जारी ओलम्पिक खेलकुद अन्तर्गत पुरुष फुटबलको क्वार्टरफाइनलको ड्र प्रकाशित भएको छ । आयोजकले सेमीफाइनल प्रवेशका लागि ड्र घोषणा गरेको हो ।

समूह चरणका खेल सकिएपछि अन्तिम आठको समीकरण पुरा भएको छ । अब प्रतियोगितामा अन्तिम आठबाट क्वार्टरफाइनल खेलबाट सेमीफाइनल र फाइनल खेल बाँकी छन् ।

अन्तिम आठमा समूह ए बाट जापान विजेता र मेक्सिको उपविजेता बनेका छन्, समूह बि बाट साउथ कोरिया विजेता, न्यूजिल्याण्ड उपविजेता बनेका छन्, समूह सीबाट स्पेन समूह विजेता र इजिप्ट उपविजेता बनेका छन् । त्यसैगरी समूह डीबाट ब्राजिल विजेता र आइभरी कोष्ट उपविजेताको रुपमा क्वाटरफाईनलमा प्रवेश गरेका छन् ।

उपाधी दाबेदार दुई टिम फ्रान्स र अर्जेन्टिना भने समूह चरणबाटै आउट भएका छन् । अन्तिम खेलमा स्पेनसँग बराबरीमा रोकिएको अर्जेन्टिना गोलअन्तरमा पछि पर्दै आउट भएका छन् ।

आयोजकले सार्वजनिक गरेको ड्र अनुसार क्वार्टरफाइनल खेलमा आयोजक जापनले न्युजिल्याण्डको सामना गर्नेछ भने स्पेनको विरुद्ध आइभरी कोष्ट, ब्राजिलको विरुद्ध इजिप्ट र साउथ कोरियाको विरुद्ध मेक्सिको बिच प्रतिस्पर्धा हुनेछ ।