बिर्तामोड/ जिल्ला कोभिड खोप व्यवस्थापन समिति झापाले खोप दुरुपयोगमा संलग्न रहेको अभियोग लागेका बिर्तामोड नगरपालिकाका स्वास्थ्य अधिकारी ओम खड्कालाई निलम्बन गरेको छ ।

शनिवार समितिको आकस्मिक बैठकले आरोपितलाई पदमै रहँदा छानविनमा कठिनाइ हुने कारण देखाउँदै छानविन पुरा नहुन्जेल सम्मका लागि निलम्बन गरेको हो ।

शनिवार जिल्ला प्रशासन कार्यालयमा बसेको बैठकले आरोपित खड्कालाई छानविन अवधिभरका लागि निलम्बन गर्न जिल्ला स्वास्थ्य कार्यालयलाई निर्देशन दिएको प्रमुख जिल्ला अधिकारी श्रवण कुमार तिमिल्सीनाले बताए ।

खोप दुरुपयोगका विषयमा राजनीतिक दल, सामाजिक संघसंस्था र नागरिक स्तरबाट खड्कामाथि कारवाहीका लागि दवाव परेपछि समितिको बैठकले सहायक प्रमुख जिल्ला अधिकारी त्रिलोचन रिजालको नेतृत्वमा ५ सदस्यीय छानविन समिति गठन गर्र्दै निलम्बन गर्ने निर्णय गरेको हो ।

यसैगरी जिल्ला भरी जारी खोप कार्यक्रम विवादित बनेको ठहर गर्र्दै समितिले झापामा हालसम्म कति जना र कसकसलाई खोप लगाइयो भन्ने विवरण समेत सार्वजनिक गर्न जिल्ला स्वास्थ्य कार्यालय झापालाई निर्देशन दिएको छ ।

जिल्लामा जारी खोप कार्यक्रममा व्यापक अनियमितता भएको र सरकारी मापदण्ड विपरीत आफू निकटस्तलाई खोप दिइएको विषय नागरिक स्तरबाट उठेपछि आज बसेको खोप व्यवस्थापन समितिको बैठकले त्यस्तो निर्देशन दिएको हो ।