काठमाडौं। प्रधानमन्त्री शेरबहादुर देउवाले नेपाल विद्युत प्राधिकरणमा कुलमान घिसिङलाई नियुक्त गर्न ऊर्जामन्त्री पम्फा भुसाललाई ठाडो निर्देशन दिएका छन् । प्रधानमन्त्री देउवाको सचिवालयले जनाए अनुसार आवश्यक सबै प्रक्रिया पुरा गरेर घिसिङलाई प्राधिकरणको कार्यकारी निर्देशक नियुक्त गर्न भुसाललाई निर्देशन दिएका हुन् ।

झण्डै एक वर्षअघि घिसिङ्को कार्यकाल पुराभएपछि तात्कालीन केपी ओली सरकारले हितेन्द्रदेव शाक्यलाई प्राधिकरणको कार्यकारी बनाएर लगेको थियो । उनको काम सन्तोषजनक नभएको ठहर गर्र्दै देउवा सरकारले उनलाई हटाउने तयारी थालेको हो ।

दैनिक १४ घण्टे लोडसेडिङ अन्त्य गरेर जनतामाझ लोकप्रिय बनेका कुलमानले चार वर्षे आफ्नो कार्यकालमा लोडसेडिङ अन्त्य गर्नुका साथै ऋणमा डुबेको प्राधिकरणलाई नाफा दिएर चर्चा कमाएको थिए । त्यति नै बेला उनको पुनर्नियुक्ति हुनुपर्ने आवाज ब्यापक रुपमा मिडिया देखि सामाजिक संजाल लगायतबाट उठ्दै आएपनि ओली सरकारले नियुक्ति दिएको थिएन ।

तत्कालिन ऊर्जामन्त्री जनार्दन शर्माको सिफारिसमा २०७३ भदौ २९ गतेको मन्त्रिपरिषद्को बैठकले प्राधिकरणको प्रवन्ध निर्देशकको रुपमा घिसिङको प्रवेश भएको थियो । ओली सरकारको बहिगर्मनपछि प्राधिकरणमा फेरि कुलमान आउने चर्चा चलिरहेको बेला मंगलबार देउवाले ठाडो निर्देशन नै दिएपछि पुनः घिसिङ्को चर्चा शुरु भएको छ ।