लिम्बुवानखबर। खोटाङको जन्तेढुंगा गाउँपालिकाले आफ्नो लेटरहेडमा किरात लिपि प्रयोगमा ल्याएको छ । ६ वटा वडापालिका रहेको जन्तेढुंगामा साउन १ गतेदेखि आफ्नो लेटरहेडमा नेपाली भाषाको अतिरिक्त किरात लिपि प्रयोगमा ल्याएको हो ।

किरात समुदायको बाहुल्यता रहेको एवं पुरापूर्व कालदेखि प्रयोग हुँदै आएको किरात लिपिको संरक्षण एवं संवद्र्धनका लागि गाउँपालिकाको लेटरहेडमा किरात लिपि प्रयोग सुरु गरिएको पालिकाले जनाएको छ ।

गाउँपालिकाको गत असार २७ गतेको पालिकाको बैठकले साउन १ गतेदेखि लागु हुनेगरी गाउँपालिका तथा गाउँपालिका मातहतका कार्यालयको लेटरहेडमा गाउँपालिकाको नाम किरात लिपिमा समेत उल्लेख गर्ने निर्णय गरेको थियो । हालका लागि गाउँपालिका र ६ वटा वडाकार्यालयमा गाउँपालिकाको नाम नेपाली भाषासँगै किरात लिपिमा लेखिएको लेटरहेड प्रयोगमा ल्याइएको छ । ‘गाउँपालिकाको लेटरहेडमा नेपाली भाषामा जे लेखिएको छ, त्यसैलाई ट्रान्सलेट गरेर किरात लिपिमा राखिएको छ,’ पालिकाले जनाएको छ ।

खोटाङका १० स्थानीय तहमध्ये हलेसी तुवाचुङ नगरपालिकाले गत वर्षदेखि नै आफ्नो लेटरहेडमा चाम्लिङ राई भाषा प्रयोगमा ल्याइसकेको छ । यस्तै, वाम्बुले राईको बाहुल्यता रहेको हलेसी तुवाचुङ नगरपालिका–१ बाहुनीडाँडा र हलेसी तुवाचुङ नगरपालिका–२ डिकुवामा वाम्बुले भाषा तथा तिलुङ राईको बाहुल्यता रहेको हलेसी तुवाचुङ नगरपालिका–३ च्यास्मीटारमा तिलुङ भाषालाई सरकारी कामकाजमा मान्यता दिइएको छ । बाहुनीडाँडा र डिकुवाको लेटरहेडमा वाम्बुले तथा च्यास्मीटारको लेटरहेडमा तिलुङ भाषालाई प्रयोगमा ल्याइएको मेयर इवन राईले बताए ।