लिम्बुवानखबर । थारु जातीहरुको पर्व रैब अर्थात बड्का अटवारी पर्व आज धुमधाम मनाईदैछ । थारुहरुले हरेक वर्षको भदौ महिनाको पहिलो आइतबारदेखि यो पर्व सुरु गरी महीनाभरी पर्ने आइतबारलाई रैब दिन वा रैब पर्वका रुपमा मनाउने परम्परा रहेको छ । थारु भाषामा आइतबारलाई रैब भनिन्छ ।

यो पर्वमा घरमै बसी दही, दूध, चिउरा, चिनी, जेरी, फलफुल आदि खानेका खाने गर्दछन् । आइतबारका दिन गर्नुपर्ने संस्कार अनुसार ग्रामथानका अगुवाको आज्ञाले यो पर्व मनाउने थारु जातिहरुको सांस्कृतिक परम्परा रहेको छ ।

रैब पर्वका दिन नुन, तेल खाए पर्व भंग हुने र कुलदेवता रिसाउने सांस्कृतिक मान्यता रहिआएको थारुहरु बताउँछन् । यो पर्वमा एकाविहानै नजिकैको इना, तलाऊ, पोखरी वा खोलामा स्नानगरी प्रकृति र कुलदेवतालाई फलफूल लगायतका परिकारहरु चढाई सकेपछि त्यसलाई प्रसादको रुपमा खाने परम्परा छ । तर गत बर्षझै यो वर्ष पनि कोरोना महामारीका कारण आ–आफ्नै घरमा बसेर थारुहरुले आफ्नो पर्व मनाइँदैछन् ।

थारु जातिको धार्मिक मान्यता अनुसार बाल–बच्चालाई सु–स्वास्थ्यको कामना गर्नुको साथै कृषिजन्य बालीनालीमा रोगब्याथी नलागोस्, बाली उत्पादनमा वृद्धि होस्, समयमै बर्षा होस भन्ने कामना गर्दै यो पर्व मनाइने चलन रहँदै आएको किंवदन्ती रहेको छ ।

यस्तैगरी केही थारुहरुले यो पर्वलाई “बड्का अटवारी” भनेर पनि मनाउने गर्छन् । यो प्रत्येक बर्ष भदौ महीनाका हरेक आइतबारहरुमा अगल–अलग गाउँहरुले आफ्नो अनुकुल पारी आइतबार रैब वा अटवारी मनाउने गर्छन् ।