लिम्बुवानखबर, ८ भदौं । नेकपा एमालेको आज बसेको स्थायी कमिटी बैठकले दश बुँदे सहमति कार्यान्वयन गर्ने निर्णय गरेको छ । अब भने पूर्वप्रधानमन्त्री मावधकुमार नेपालको साथ छोडेका असन्तुष्ट दश स्थायी कमिटी नेताहरुसहित बसेको बैठकले दश बुँदे कार्यान्वयन गर्ने निर्णय भएको हो ।

स्थायी कमिटी बैठकले आगामी मंसिर १० देखि १२सम्मा दशौं महाधिवेशन निर्णय गरेको छ । त्यसैगरी असोज ४ देखि ६ सम्ममा विधान महाधिवेशन गर्ने निर्णय गरेको छ । बैठकले एमालेको पार्टी सदस्यता २ जेठ २०७५ अगाडिको आधारबाट अगाडि बढाइने र सदस्यता नवीकरण असोज मसान्तभित्र गरि सक्ने निर्णय भएको जनाएको छ ।

एमाले पार्टी संरचना २ जेठ २०७५ अगाडिको अवस्थामा नै फर्किएको स्रोतले बताएको छ । दश प्रतिशत केन्द्रीय सदस्य मनोनयन, विभागहरुको पूर्णता दिने लगायत प्रयोजनका निम्ति सात सदस्यीय कार्यदल बनाइएको छ ।

कार्यदलमा उपाध्यक्ष भीम रावल, महासचिव ईश्वर पोखरेल, उपमहासचिवहरु विष्णुप्रसाद पौडेल र घनश्याम भुसाल, स्थायी कमिटी सदस्य सुरेन्द्र पाण्डे र लेखराज भट्ट रहेका छन् ।

एमालेले आगामी कात्तिक ६ गते वडा र कात्तिक ९ गते पालिका, नगर अधिवेशन गर्ने निर्णय गरेको छ । साथै, भदौ १६ देखि जिल्ला कार्यकर्ता भेला र जनसंगठनका भेला गर्ने तथा भदौ १० गते केन्द्रीय कमिटीको बोलाउने निर्णय भएको छ ।