धरान । राष्ट्रिय जनमुक्ति पार्टीले आफ्नो छैठौं राष्ट्रिय महाधिवेशन सुनसरीको धरानमा गर्ने भएको छ । जनमुक्तिले भदौं २६ गते धरानको गीत भवनमा महाधिवेशनको उद्घाटन गर्ने जनाएको छ ।

महाधिवेशन सम्पर्क समितिका संयोजक प्रकाश येङ्देनका अनुसार उद्घाटन पश्चात २७ र २८ गते दुईदिनसम्म बन्दसत्र चल्ने छ भने यहि बन्दसत्रबाट नयाँ कार्य समिति चयन गरेर अगाडि बढ्ने बताए ।

वैकल्पिक शक्ति निर्माणका लागि जुटेको राष्ट्रिय जनमुक्ति पार्टी अधिराज्यभरिका ६४ जिल्लाबाट प्रतिनिधि, पर्यवेक्षकको उपस्थिति रहनेछ ।

कोरोना कहरका कारण पटक–पटक सर्दै आएको महाधिवेशन यो पटक भने सम्पन्न गरेर नै जाने संघीय परिषदको ११ औं बैठकले निर्णय गरेको जनाएको छ ।

बैठकमा पूर्व राष्ट्रिय अध्यक्ष एमएस थापाले पार्टीले उठाएको मूलधारको बाटोलाई बढवा गरेर लगे पार्टी तथा कार्यकर्ताको भविष्य उज्वल रहने बताए । जातीय मुक्ति र हरेक क्षेत्रमा समानुपातिक प्रतिनिधित्वको अस्त्र बोकेर अगाडि बढेको पार्टी भएको हुँदा लक्ष्यमा पुग्न सकिनेमा थापाले जोड दिए ।