इलाम । इलामका अग्रज पत्रकार सोम सुसेलीले इलाम नगरपालिकाको नगर सभापतीमा उम्मेद्धारी घोषणा गरेका छन् । नेपाली कांग्रेसको आसन्न १४औँ महादिवेशनमा इलाम नगरपालिका वडा नम्वर ९बाट क्षेत्रिय प्रतिनिधिमा निर्वाचित सुसेलीले इलाम नगरपालिकाको नगर सभापतिमा उम्मेद्धारी घोषणा गरेका हुन् ।

नेपाल पत्रकार महासंघ प्रदेश नम्वर एकका निवर्तमान उपाध्यक्ष तथा पत्रकार महासंघ इलाम शाखाका संस्थापक सचिव समेत रहेका सुसेली पूर्व सभापति समेत हुन् । उनी २०४५ सालदेखी नेपाली कांग्रेसमा सक्रिय रहँदै आएका छन् । कांग्रेसको लोकतान्त्रिक समाजवादमा निरन्तर यात्रा गरिरहेका सुसेलीको उम्मेद्वारीको इलाममा चर्चा शुरु भएको छ । उनी २०५३ साल देखी नेपाली कांग्रेसको क्रियाशिल सदस्य समेत रहेर काम गरिरहेका छन् ।

रेडियो नेपालवाणी एफएमका स्टेसन मेनेजर समेत रहेका सुसेली नेपाली कांग्रेसको बिभिन्न उपसमितिमा रहेर सक्रियता जनाउँदै आएका छन् । नेपाली कांग्रेस केन्द्रिय कार्य समितिले उनलाई कोभिड १९ को इलाम जिल्लाको सूचना संयोजकको पनि जिम्मेवारी दिएको छ । नेपाल ट्रेड युनियन कांग्रेस केन्द्रीय समिति अन्तर्गतको अनुसन्धान तथा अनुगमन उप–समितिको समेत जिम्मेवारी सम्हालेका छन् ।

यस्तैगरी अहिले नेपाल मानव अधिकार संगठनका केन्द्रीय सदस्य तथा प्रदेश नम्वर एकका संयोजक समेत रहेका सुसेली यस अघि स्थानीय, प्रदेश र संघीय निर्वाचनमा नेपाली कांग्रेसको प्रचार समिति संयोजक भएर पनि काम गरेका छन् ।