इटहरी । संखुवासभाको मादीमा हत्या गरिएको अवस्थामा फेला परेका एकै परिवारका ६ जनाको अन्त्येष्टि बुधबार साँझ सुनसरीको इटहरीस्थित बुढीगंगा घाटमा गरिएको छ ।

सोमबार संखुवासभाको मादी नगरपालिका–१ खोलागाउँमा हत्या गरिएको अवस्थामा फेला परेका तेजबहादुर कार्कीसहित ६ जनाको अन्त्येष्टि गरिएको हो ।

बीपी कोइराला स्वास्थ्य विज्ञान प्रतिष्ठान धरानमा पोष्टमार्टमपछि बुढीगंगा घाटमा अन्त्येष्टि गरिएको मृतकका भतिजा विनोद कार्कीले जनाएका छन् ।

संखुवासभा मादी नगरपालिका–१ उमलिङको खोला गाउँका ५२ वर्षीय तेजबहादुर कार्की, उनकी आमा ८४ वर्षीया पार्वती कार्की, श्रीमती ५२ वर्षीया कमला कार्की, बुहारी ३२ वर्षीया रञ्जना कार्की, नाति ११ वर्षीय दीपेन कार्की र नातिनी ७ वर्षीया गोमा कार्कीको हत्या भएको थियो ।

शव भेटिएपछि प्रहरीले निरन्तर अनुसन्धान जारी राखे बताइएको छ । यद्यपी तीन दिनसम्ममा प्रहरी हालसम्म कुनै निष्कर्षमा पुगेको छैन ।