फाइल तस्वीरः

लिम्बुवानखबर, २५ भदौं । नेपाल सरकारले क्यान्सर, मिर्गौलाका गम्भीर बिरामी र मेरुदण्ड पक्षघात भएका बिरामीलाई मासिक ५ हजार रुपैयाँ भत्ता दिने घोषणा गरेको छ ।

आज बसेको संसदमा बजेट अध्यादेशको प्रतिस्थापन विधेयक प्रस्तुत गर्दै अर्थमन्त्री जनार्दन शर्मा प्रभावकरले यस्ता गम्भीर रोग लागेका बिरामीलाई मासिक ५ हजार भत्ता उपलब्ध गराउने घोषणा गरेका हुन् ।

२०७४ सालको निर्वाचन अघि तत्कालीन शेरबहादुर देउवा सकरारले क्यान्सर, मिर्गौलाका गम्भीर रोगी र स्पाइनल इन्जुरी भएर प्यारालाइसिस भएकाहरुलाई उनीहरुको जीविकोपार्जनमा थप मद्दत पुगोस् भनी मासिक ५ हजार रुपैयाँ भत्ता दिने निर्णय गरेको थियो ।

चुनावपछि आएको नेकपा ओली सरकारले त्यसलाई खारेज गरेको थियो । जसका कारण जिल्ला स्वास्थ्य कार्यालय र सम्बन्धित जिल्लाका प्रमुख जिल्ला अधिकारीको स्वीकृति लिएर बिरामीको प्रमाणपत्र पाएकाहरुले पनि हालसम्म भत्ता पाएका थिएनन् ।

त्यति बेलै स्पाइनल इन्जुरी पीडित संघर्ष समितिले ओली सरकारको निर्णयविरुद्ध सडकमा आन्दोलन समेत गरेको थियो । तर ओली सरकार चुप लागेको थियो ।

अहिले आफैं प्रधानमन्त्री भएको समयमा कांग्रेस सभापति देउवाले पुनः तीन प्रकारका विरामीहरुलाई मासिक भत्ता दिने निर्णयलाई कार्यान्वयन गर्न अघि बढेका छन् । सरकारी तथ्यांकअनुसार देउवा सरकारको पूर्ववत निर्णयअनुसार निर्णय कार्यान्वयन भएमा मासिक करिव एक लाख बिरामीलाई भत्ता दिनु पर्नेछ ।