काठमाडौ । लिम्बु भाषाको म्युजिक भिडियो “युप्पारुङ” क्वालिटी इन्टरटेनमेन्ट अवार्ड २०७८ को टप फाइभमा मनोनयन भएको छ । क्वालिटी फिल्मस प्रा.लि.द्वारा आयोजित अवार्डमा “युप्पारुङ्” भिडियो उत्कृष्ट निर्देशनको मनोनयनमा परेको हो ।

भिडियोलाई निर्देशन गरेका निर्देशक सागर केरुङले उक्त मनोनयन पत्र पाएका हुन् । विशेष गरेर लिम्बु भाषा, साहित्य प्रति औधी रुचाउने केरुङ् पछिल्लो समयमा लिम्बु चलचित्र, लिम्बु गीत लगायत कलाकारितासँगै उत्कृष्ट निर्देशकको रुपमा दर्शक स्रोतहरुले मन पराएका छन् ।

प्रेम पन्धाकको शब्द÷संगीतमा सुनिता सुब्बा र किरन येक्तेनको स्वर रहेको छ । चन्द्रकला साँवाको निर्माण रहेको उक्त म्युजिक भिडियोमा अमृता लिम्बू जबेगु र आदर्श आङ्देम्बेले अभिनय गरेका छन भने सञ्जय आचार्यको छायांकन÷सम्पादन रहेको छ ।

क्वालिटी फिल्म्सका प्रवन्ध निर्देशक तथा अवार्ड कमिटीका अध्यक्ष उमेश गुरुङअनुसार आगामी असोज पहिलो साता अवार्ड समारोहको आयोजना हुने छ भने समारोहमा वरिष्ठ चलचित्र लेखक, निर्देशक तथा कलाकार तुलसी घिमिरेलाई क्वालिटी इन्टरटेनमेन्ट लाइफटाइम एचिभमेन्ट अवार्ड र म्युजिक डायरी मासिक तथा ईम्युजिकडायरी अनलाइनका सम्पादक तुलसी गिरी ‘भावुक’ लाई क्वालिटी इन्टरटेनमेन्ट रङ्ग पत्रकारिता पुरस्कार प्रदान गरिने आयोजकले जनाएको छ ।