दमक । झापाको दमकमा कदम थिएटरद्वारा निर्माणाधिन सेउपाखा बहुसांस्कृतिक नाटक घरमा रोट्राक्ट क्लब अफ दमकसँगको सहकार्यमा लैङ्गिक अल्पसंख्यकको समस्यामा आधारित नाटक ‘तिम्रो आँखामा खसेको साँझ’ मञ्चन भएको छ ।

नाट्य संस्कृति विकास र अल्पसंख्यक अधिकारका निम्ति पैरवी गर्ने उद्देश्य अनुरूप कदमले नाटक मञ्चन गरेको हो । सोमबार साँझ ५ बजे नाटकको अन्तिम शो मञ्चन गरिएको थियो । १ घण्टा लामो उक्त नाटकले यौनिक अल्पसंख्यकको विषयमा उठान गरेको छ ।

नाटकले लैङ्गिक तथा यौनिक अल्पसंख्यकहरूलाई आजको समाजमा पनि निर्वाध र सहज रूपले बाँच्न सक्ने अवस्था नरहेको विषयलाई उजागर गर्न खोजेको विषयलाई उठान गरेको छ । यस मुद्दालाई सामाजिक तहमा उठान गरौँ भनेर नै आफूहरुले कदम थिएटर दमकसँग सहकार्य गरेर नाटक मञ्चन गरेको क्लबका अध्यक्ष सपना लिम्बुले वताइन् ।

नाटकका परिकल्पनाकार तथा निर्देशक सागर खाती कामीले नाटकले उठाउन खोजेको मुद्दालाई नजिकबाट नियालिए दिनुभएकोमा दर्शकलाई धन्यवाद दिदैं आगामी नाटकहरुमा थप हौसल प्रदान गर्न अनुरोध गरेका छन् । उनले कोभिड संक्रमण जोखिमका कारण भर्चुअल फर्ममा पुगेको रङ्गमञ्च पुनः पुरानै अवस्थामा फर्कन थालेकोमा खुशी लागेको बताएका छन् ।

नाटक हरेक दिन दिउँसो २ बजे र साँझ ५ बजे गरी दुई शो देखाइएको थिएटरका सचिव कमन देवानले बताए । देवानका अनुसार हाल कदम थिएटरको दमक ९ स्थित अस्थायी नाटक घरमा नाटक मञ्चन भएको हो । कदमले प्रदेश सरकारको सहयोगमा बहुबर्षे योजना अन्तर्गत सेउपाखा बहुसाँस्कृतिक नाटक घरको आधारभूत संरचना निर्माण सकेको छ । निर्माण कार्य चाडै नै सम्पन्न गर्न समेत लागी परेको बताए ।

नाटक लैङ्गिक तथा यौनिक अल्पसंख्यक किसोरीले भोग्नुपरेको कथामा आधारित रहेको लेखक प्रकाश शर्मा अधिकारीले जानकारी दिए । दर्शकलाई फरक विषयमा सोच्न लगाउने उद्देश्यले जटील विषय रोजिएको शर्माको भनाइ छ । उनले कोभिड संक्रमण जोखिमका कारण भर्चुवल फर्ममा पुगेको रङ्गमञ्च पुनः पुरानै अवस्थामा फर्कन थालेकोमा खुशी लागेको बताएका छन् ।

नेपालको संविधानमा यौनिक अल्पसंख्यकको अधिकारका बारेमा स्पष्ट उल्लेख गरेको छैन । विश्व स्वास्थ्य संगठनका अनुसार तेस्रो लिङ्गी तथा समालिङ्गी हुनु मानसिक समस्या हैन । सन् १९९० को दशकपछि यसबारे बहसहरु भएका छन् । त्यसपछि विश्व स्वास्थ्य संगठनले यसलाई प्राकृतिक तथा मानवीय स्वाभावको रूपमा व्याख्या गरेको छ ।

अन्तिम शोमा हल खचाखच भरिएको बताउँदै थिएटरका सचिव देवानले भने– “रंगमञ्च तर्फ मोफलसमा समेत दर्शकहरुको उपस्थिति बढ्न थालेपछि अब थिएटरको पुरै संरचना निर्माण गर्न प्रेरणा र हौसल्ला मिलेको छ ।”