लिम्बुवानखबर, २ असोज । बङ्गालको खाडी र मध्य भारतबाट उत्तरतिर सर्दै गरेको न्यून चापीय प्रणाली तथा पश्चिमी वायु प्रणालीको प्रभावले नेपालमा दशैंसँगै भिषण बर्षा भएको छ ।

मौसम पूर्वानुमान महाशाखाले जनाएको अनुसार मौसमी वायु प्रणालीको प्रभावले हाल देशको अधिकांश भू–भागमा सामान्य बदली रही धेरै स्थानमा वर्षा भइरहेको छ । बर्षाले धानबालीमा ठूलो क्षति पु¥याउन सक्ने भन्दै कृषकहरु चिन्तित भएका छन् । प्रदेश नं १ र सुदूरपश्चिमका केहि स्थानमा भारी वर्षा समेत भएको छ । बर्षाका कारण भित्र्याउनै लागिएको धान बर्षाले भिजेसँगै धानखेती गर्ने कृषकहरु मारमा परेका छन् ।

पाकिस्तान, भारत हुँदै नेपाल प्रवेश गरेको पश्चिमी वायु अहिले नेपालको पूर्वी भागतर्फ सरिरहेको छ । यो वायु सुस्त गतिमा अघि बढ्ने भएकाले नेपालमा अझै केही दिन प्रभाव रहने मौसमविद्हरुले बताएका छन् ।

काठमाडौँ उपत्यकामा बदली रहनुका साथै हल्का वर्षा समेत भइरहेको छ । उपत्यकाको आकाशमा बिहानैदेखि कुहिरो लागेको छ । देशको पश्चिमी भेगमा भारी वर्षा भएको छ । महाशाखाको पछिल्लो विवरणमा दिपायलमा १६६, डडेलधुरामा १५५, घोराहीमा १३३, भैरहवामा ११२, धनगढीमा ९० र पोखरामा ५६ मिलिमिटर वर्षा भएको छ ।

आगामी तीन दिनको मौसम पूर्वानुमान बुलेटिनअनुसार आज दिउँसो देशभर सामान्यदेखि पूर्णबदली रहनेछ । प्रदेश नं १, प्रदेश नं २ लुम्बिनी, कर्णाली प्रदेश र सुदूरपश्चिम प्रदेशका धेरै स्थानका साथै बागमती प्रदेश र गण्डकी प्रदेशका केही स्थानमा मेघगर्जन–चट्याङसहित हल्कादेखि मध्यम वर्षाको सम्भावना रहेको छ । देशका उच्च पहाडी तथा हिमाली भेगमा हल्कादेखि मध्यम हिमपातको सम्भावना रहेको जनाएको छ ।