लिम्बुवानखबर संवाददाता, १५ कार्तिक । १ नं. प्रदेशका मुख्यमन्त्री भीमप्रसाद आचार्यले प्रदेशसभा बैठकमा राजीनामा दिएका छन् । सोमबार बसेको प्रदेशसभाको बैठकमा मुख्यमन्त्री आचार्यले सम्बोधन गर्दै राजीनामा घोषणा गरेका हुन् ।

उनले राजीनामा दिएसँगै आजको कार्यसूचीमा मतदान प्रक्रिया अघि बढाउनु नपरेको बताउँदै सभामुख प्रदीपकुमार भण्डारीले कात्तिक १६ गतेसम्मका लागि सभा बैठक स्थगित भएको घोषणा गरे ।

आचार्यले विश्वासको राजीनामा दिएसँगै अब प्रदेश प्रमुखले नयाँ सरकार गठनका लागि आह्वान गर्नेछन् ।

गठबन्धनले भावी मुख्यमन्त्रीका रूपमा नेकपा एकीकृत समाजवादीका संसदीय दलका नेता राजेन्द्र राईलाई अघि सारेको छ । सरकार गठनका लागि कम्तीमा ४७ सदस्य आवश्यक पर्दछ । विपक्षी पाँचदलीय गठबन्धनले आफूहरूसँग ५० सांसदको समर्थन रहेको दाबी गरेको छ । गठबन्धनमा नेपाली कांग्रेस, नेकपा माओवादी, एकीकृत समाजवादी, जसपा र संघीय लोकतान्त्रिक राष्ट्रिय मञ्च रहेका छन् ।