दमक, २९ कार्तिक । संघीय लिम्बुवान मञ्च, नेपाल जिल्ला कार्य समिति झापाले छैटौ जिल्ला अधिवेशन मंसीर २ गते बिर्तामोडमा हुने भएको छ । मञ्चले शनिवार बिर्तामोडमा पत्रकार सम्मेलन गर्दै अधिवेशन गर्ने बताएको हो ।

अधिवेशन सम्पन्न गर्नका लागि मञ्चले विभिन्न उपसमिति निर्माण गरेको जनाएको छ । मञ्चले आर्थिक उपसमितिको संयोजकमा अमित खम्बु्, सदस्यमा तिर्थराज पौडेल र बुद्धिमान तामाङ, स्टेज ब्यवस्थापन तथा अतिथि सत्कार संयोजकमा ज्वाला इम्बुङ, सदस्यमा नारायण तामाङ र शिबकुमार राई, प्रचारप्रसार÷जनपरिचालन÷यातायात ब्यवस्थापन संयोजकमा राजा आङथुपो, सदस्यमा विजय ठाडा मगर, कृष्णबहादुर सेन्दाङ, लीलानाथ आङदेम्बे, बिक्रम चेम्जोङ, अमर माबोहाङ र प्रताप निङलेखु रहेका छन् ।

अधिवेशन संघीय लोकतान्त्रिक राष्ट्रिय मञ्चका संघीय अध्यक्ष कुमार लिङ्देन ‘मिराक’ को प्रमुख आतिथ्यमा सम्पन्न हुने जिल्ला अध्यक्ष धनबहादुर पन्धाकले सम्मेलनमा जानकारी दिएका छन् ।

पत्रकार सम्मेलनमा ५ नेताहरुले अध्यक्षमा उम्मेद्वारी घोषणा गरेका छन् । मञ्चको मंसीर २ गते हुने अधिवेशनमा अध्यक्ष पदका लागि हालका बरिष्ठ उपाध्यक्ष नगेन्द्र राई, उपाध्यक्ष ज्वाला इम्बुङ, उपाध्यक्ष अमित खम्बु, सचिब आङथुपो र सचिव तिर्थराज पौडेलले आ–आफ्नो उम्मेद्वारी पत्रकार सम्मेलनमै घोषणा गरेका छन् ।

अधिवेशनका लागि अनुमानित १० लाख खर्च हुने र उक्त खर्च जिल्लाभरका ७ हजार सदस्यबाट साथै विभिन्न संघ÷संस्थाबाट जुटाइने अध्यक्ष पन्धाकले बताए ।