लिम्बुवानखबर, १५ पौष । आज गुरुङ समुदायले ‘तमु ल्होसार’ पर्व मनाउँदैछन् । गुरुङले पुरानो वर्षलाई बिदाइ गरी नयाँ वर्षलाई स्वागत गर्न तमु ल्होसार मनाउने चलन रहेको छ ।

‘ल्हो’ को अर्थ वर्ष र ‘सार’ को अर्थ फेरिनुभएकाले वर्ष फेरिने दिनलाई ‘तमु ल्होसार’ भनिएको हो । गुरुङ समुदायले नयाँ वर्षका रुपमा तमु ल्होसारलाई भव्यरुपमा मनाउने गरेका छन् ।

तमुवान क्षेत्रको लमजुङ, गोरखा, तनहुँ, स्याङ्जा, मनाङ, कास्की, पर्वत लगायत जिल्लामा गुरुङ जातीहरुले पुस १५ मा यो पर्व मनाउने गरेका छन् भने देशभरि छरिएर रहेका सबै गुरुङ जातीहरुले देशव्यापी रुपमा पर्व मनाउने गरेका छन् । आज काठमाडौं टुडिखेलमा तमु समाजले बृहत तमु ल्होसार पर्व मनाउने तयारी गरेको आयोजकले जनाएको छ ।

आज बर्षभरिकै लामो रात हुने र यसपछिका रात घट्दै जाने भएकाले पनि यस पर्वको महत्व रहेको बताइन्छ ।

पर्वका अवसरमा आज सरकारले देशभर सार्वजनिक बिदा दिएको छ । यसअघि २०७७ साल चैत ९ गते प्रकाशित राजपत्रमा तमु ल्होसार सार्वजनिक बिदा हुने चार्डको सूचीमा थिएन । आदिवासी जनजाति महासंघले आदिवासी जनजातिहरुको राष्ट्रिय चार्डमा सरकारले विदा नदिएकोमा व्यापक विरोध गर्दै आइरहेको छ ।