दमक, २७ पुष । संघीय लोकतान्त्रिक राष्ट्रिय मञ्च अन्तर्गतको संघीय लिम्बुवान प्रान्तीय मञ्च, नेपालको प्रथम बैठक बस्ने जनाएको छ । मञ्चको यहि मंसिर २४ र २५ गते धरानमा सम्पन्न तेस्रो प्रान्तीय अधिवेशन पश्चात पहिलो बैठक बस्न लागेको हो ।

संघीय अध्यक्ष कुमार लिङदेन ‘मिराक’ज्यूको उपस्थितिमा लिम्बुवानको नौ जिल्ला भित्र संगठनलाई मजबुत, शसक्त र सुदृणीकरण गर्दै आगामी कार्यक्रम र चुनाव लक्षिक कार्यक्रमहरुलाई तिब्र रुपमा अघि बढाउने लगायतका महत्वपूर्ण एजेण्डाहरुमा बैठक बस्न लागेको उपाध्यक्ष ज्ञानुहाङ इम्बुङले बताएका छन् ।

विगत १६ बर्ष देखि निरन्तर पहिचान, संघीयता, सह–अस्तित्व, समुदायिक समाजवाद र इकोइकोनोमीको वकालात गर्दै आईरहेको मञ्चले १०+१ प्रान्त पुनः संरचना गरेमात्र नेपालको संघीयताले पूर्णता पाउने भनी मुद्दामा केन्द्रित लक्षित कार्यक्रमहरु गर्दै आइरहेको छ । अहिलेको सात प्रदेशले पहिचान र अस्तित्व रक्षा नगर्ने भन्दै त्यसको बिरोध गरिरहेको मञ्चले सबै कलस्टरहरुलाई मिलाएर लानको लागि प्रान्तहरु पुनः निर्माण गर्नुपर्ने बताउँदै आएको छ ।

२०६२ सालमा स्थापित भएको मञ्चले सयौं आन्दोलन र कार्यक्रमहरु गर्दै संघीयताको पक्षमा उभिएर लिम्बुवान आन्दोलनलाई उच्चाईमा पुराएको भन्दै यो आन्दोलनलाई रक्षा गर्नको निमित्त पनि पार्टीलाई चलायमान बनाउनलाई समेत यो बैठकले महत्वपूर्ण निर्णय गर्दै संगठन निर्माणमा जोड दिदैं पहिचानको क्रान्तिमा उभिन्न लिम्बुवानबासीलाई अनुरोध गर्नलाई पनि बैठक अपरिहार्य भएको उपाध्यक्ष इम्बुङ्ले बताउनु भएको छ ।

एक दिनमात्र हुने सो बैठक झापाको दमकमा बस्ने पार्टी स्रोतले बताएको छ ।