पथरीशनिश्चरे, ४ माघ । संघीय लोकतान्त्रिक राष्ट्रिय मञ्च, संघीय लिम्बुवान प्रान्तीय मञ्च, नेपाल मोरङ जिल्ला कार्य समितिले नव निर्वाचित संघ र प्रान्तका नेताहरुलाई सम्मान गरेको छ ।

पथरीस्थित सिरीजंगा सामुदायिक बनको सभाहलमा मंगलबार आयोजित सम्मान कार्यक्रममा जिल्लाले मञ्चको तेस्रो संघीय राष्ट्रिय महाधिवेशनबाट निर्वाचित नेता र लिम्बुवान प्रान्तमा निर्वाचित नेताहरुलाई स्वागत गरेको हो ।

कार्यक्रममा मञ्चका उपाध्यक्ष ज्ञान बहादुर गुरुङ्ले सम्मानित नेता नेतृत्वहरुलाई आगामी कार्यकालमा पार्टीलाई अझ स्थायी बनाउँदै सबै प्रकारको कार्यमा लाग्न नेताहरुलाई निर्देशन दिएका छन् । मञ्च अब चुप लागेर बसेमा प्रदेश नं. १ को नामकरण पहिचानको विरुद्धमा हुने भन्दै चनाखो बस्न पनि उनले भने । प्रदेश नं. २ को नामकरण पहिचानको आधारमा मधेस प्रदेश घोषणा भएकोमा आभार प्रकट गर्दै नेता गुरुङ्ले हाम्रो आन्दोलनले हालसम्म प्रदेश १ को नामकरण रोकिएकोमा अब पुनः घोषणा हुन सक्ने भएको हुँदा नेताहरु सक्रिय हुनु पर्नेमा जोड दिएका छन् ।

यसैगरी संघीय महासचिव अशोक चेम्जोङले लिम्बुवान आन्दोलनको जगबाट उठेको पहिचान आन्दोलन मधेसमा पुगेर सफल भएको भन्दै अब चुप लागेर बस्नु भनेको लिम्बुवान आन्दोलन परास्त हुनु भएको हुदाँ सबै नेताहरु हिम्मतका साथ ठूलो गर्जन गर्दै अघि बढ्न अनुरोध गरेका छन् । प्रदेशमा कुनै पनि पार्टीले बहुमत ल्याउन नसक्ने जिकीर गर्दै चुनावको पूर्वसन्ध्यामा मञ्च तिब्र संगठन विस्तार, क्रियासिल वितरण र प्रशिक्षणमा केन्द्रित हुने पनि बताए ।

यसैगरी कार्यक्रममा लिम्बुवान प्रान्तीय महासचिव दिलकुमार लावती, संघीय सह–सचिव चौकीदार तामाङ लगायत नेताहरुले पनि आ–आफ्ना धारणा राखेका थिए । कार्यक्रममा मञ्च र प्रान्तका मोरङ जिल्लाबाट निर्वाचित नेताहरुको उपस्थिति रहेको थियो । कार्यक्रममा प्रान्तमा निर्वाचित नेताहरुलाई मनोयन पत्र हस्तान्तरण समेत गरिएको थियो ।

मोरङ जिल्ला अध्यक्ष जीवन खेवाको अध्यक्षतमा भएको कार्यक्रमको सहजीकरण सचिव वरुण लाबुङ्ले गरेका थिए भने स्वागत सम्मान जिल्ला बरिष्ठ उपाध्यक्ष विशाल तिरुवाले गरेका थिए ।