५ माघ, काठमाडौं । कतारमा आगामी नोभेम्बर २१ देखि डिसेम्बर १८ सम्म हुने विश्वकप फुटबल प्रतियोगिताका लागि टिकटक विक्री शुरु गरेको छ । बुधबारदेखि ‘कतार वर्ल्ड कप’को टिकट बिक्री गर्न थालिएको अन्तर्राष्ट्रिय समाचार माध्यमले उल्लेख गरेका छन् ।

कोभिड–१९ लाई लिएर चिन्ता जारी रहेका बेला मूल्य घटाएर विश्वकप फुटबल प्रतियोगिताको टिकट बेच्न थालिएको हो । कतारका स्थायी बासिन्दा र विदेशी कामदारले ११ अमेरिकी डलरमा रंगशालामा गएर विश्वकप फुटबल हेर्न पाउने बताइएको छ । फिफाले कतारी नागरिक र विदेशी कामदारको हकमा एक खेलका लागि टिकेटको न्यूनतम मूल्य ११ अमेरिकी डलर तोकेको फिपा स्रोतले जनाएको छ ।

अन्तर्राष्ट्रिय दर्शकको हकमा भने टिकटको न्यूनतम मूल्य ६९ डलर निर्धारण गरिएको फिफाले जनाएको छ । जुन दर सन् २०१८ को विश्वकपमा तोकिएको भन्दा एकतिहाइले कम हो ।

बाहिरबाट आउने दर्शकका लागि फाइनल खेलको टिकट मूल्य भने १ हजार ६०७ डलरसम्म पुग्न सक्ने समाचारमा जनाइएको छ । तर अधिकारीहरुले अरब मुलुकमा हुन लागेको पहिलो विश्वकपमा रंगशालाभित्र प्रवेश दिइने दर्शकको संख्या भने उल्लेख गरेका छैनन् ।

टिकटका विभिन्न प्याकेजका लागि फेब्रुअरी ८ गतेभित्र आवेदन दिन सकिने जनाइएको छ । ‘¥यानडम ड्र’ बाट छानिएका व्यक्तिलाई मार्च ८ गतेसम्म यसबारे जानकारी गराइने छ ।

आयोजक कतारका अनुसार प्रतियोगिता हेर्न झण्डै १२ लाख मानिस आउनसक्ने बताइएको छ । कतारमा हुने आगामी विश्वकपका लागि विभिन्न ८ वटा रंगशालाहरु निर्माण भएका छन् ।