काठमाडाैं । सत्तारूढ दलहरूले नेपाली कांग्रेस नेता रामचन्द्र पौडेलको संयोजकत्वमा स्थानीय तह निर्वाचनका लागि तयारी तथा अनुगमन समिति गठन गरेका छन्।

प्रधानमन्त्री निवास बालुवाटारमा मंगलबार बिहान बसेको बैठकले समितिले गठन गर्ने निर्णय गरेको हो।

समितिका सदस्यहरू कांग्रेसबाट महामन्त्री गगन थापा र सञ्चार तथा सूचना प्रविधि मन्त्री ज्ञानेन्द्रबहादुर कार्की, नेकपा (माओवादी केन्द्र) बाट सचिवालय सदस्यद्वय वर्षमान पुन र देव गुरुङ, नेकपा (एकीकृत समाजवादी) बाट महासचिव वेदुराम भुसाल र उपमहासचिव विजय पौडेल, जनता समाजवादी पार्टी (जसपा) बाट वरिष्ठ नेता अशोक राई र केन्द्रीय कार्यकारणी समिति सदस्य रेणु यादव तथा राष्ट्रिय जनमोर्चाबाट सचिव हिमलाल पुरी छन्।

तालमेलको मोडालिटी तयार पार्न बुधबार समितिको बैठक बस्ने भएको छ। बैठकले देशको अर्थतन्त्रको अवस्थालाई ध्यान दिंदै सरकारको तर्फबाट राजनैतिक दल, अर्थविद, योजनाविद र सरोकारवालासँग अन्तरक्रिया कार्यक्रम आयोजना गर्ने निर्णय समेत गरेको छ।

यसरी नै १ नं. प्रदेश सरकारमा रहेकाे गठबन्धनमा पनि चुनावी तालमेल हुने बताइएकाे छ । प्रदेश १ सरकारमा कांग्रेस, माअाेवादी, नेकपा एस, जसपा सँगै संघीय लाेकतान्त्रिक राष्ट्रिय मञ्च पनि सरकारमा रहेकाे छ ।