लिम्बुवानखबर संवाददाता, २९ वैशाख । प्रदेश नं. १ मा यही भोलि ३० गते सम्पन्न हुने स्थानीय तहको निर्वाचनका लागि सम्पूर्ण तयारी पूरा भएको छ । प्रदेश नं १ का प्रमुख जिल्ला अधिकारीहरुले आ–आफ्नो जिल्लामा सुरक्षाका सबै प्रबन्ध मिलाएको जनाएका छन् ।

प्रदेश १ को १४ वटै जिल्लाहरुमा भयरहित, स्वतन्त्र, निष्पक्ष र धाँधलीरहित वातावरणमा निर्वाचन गर्ने र गराउने जिम्मेवारी प्रमुख जिल्ला अधिकारीले पाएको हुँदा उनीहरुले यो भूमिका निर्वाह गरिरहेका छन् ।

प्रदेश नं १ मा कूल १३७ पालिकामा एक हजार १५७ वडा छन् । एक महानगरपालिका र दुई उपमहानगरपालिका रहेको प्रदेशमा कूल १३७ प्रमुख, १३७ उपप्रमुख र एक हजार १५७ वडाध्यक्ष तथा चार हजार ६२८ वडा सदस्य निर्वाचित हुने प्रदेश निर्वाचन कार्यालय विराटनगरले जनाएको छ ।

नेपालको संविधान २०७२ जारी भएपछि २०७४ मा पहिलोपटक स्थानीय तहको निर्वाचन सम्पन्न भएको थियो भने यो स्थानीय तह निर्वाचन दोस्रो हो । राजनीतिक दलहरुले मौन अवधि सुरु हुनुभन्दा अगावै प्रचारप्रसार, चुनावी सभा, घरदैलो कार्यक्रम, भेटघाट, ¥याली, कोणसभा जस्ता कार्यक्रम सम्पन्न गरेका छन् । प्रचार प्रसारका कार्यहरु नभएको भए पनि यतिखेर मुलुक निर्वाचनमय भएको छ ।