लिम्बुवानखबर, ८ जेठ । रेशम चौधरीको नेतृत्वमा बनेको नागरिक उन्मुक्ति पार्टीले कैलाली जिल्लामा ४ पालिका प्रमुख सहित ९९ जना निर्वाचित भएका छन् । उन्मुक्तिले चार पालिका प्रमुख र तीनवटा उपप्रमुख समेत रहेका छन् । यि मध्ये उन्मुक्तिले सबैभन्दा धेरै जानकी गाउँपालिकामा निर्वाचित भएका छन् ।

जानकीको अध्यक्षमा गणेश चौधरी, उपाध्यक्षमा लालमती देवी कठरिया निर्वाचित भएका छन् । सो पालिकाबाट ५ वडाध्यक्ष, १३ खुल्ला सदस्य, ६ जना महिला सदस्य र ६ जना दलित सदस्य गरी ३२ जना निर्वाचित भएका छन् ।

त्यसैगरी जोशीपुर अध्यक्षमा चित्रबहादुर चौधरी, उपाध्यक्षमा रेखादेवी कठरिया निर्वाचित भएका छन् भने ४ वडाध्यक्ष, ९ जना खुल्ला सदस्य, ४ जना महिला सदस्य र ४ जना दलित सदस्य गरी २३ जना निर्वाचित भएका छन् ।

त्यस्तै भजनी प्रमुखमा केवल चौधरी र उपप्रमुखमा राजु तिरुवा निर्वाचित हुँदा ३ वडाध्यक्ष, १० जना खुल्ला सदस्य, ५ महिला सदस्य र ३ जना दलित सदस्य गरी २३ जना निर्वाचित भएका छन् ।

त्यस्तै टीकापुर नगरप्रखुमा रामलाल डंगौरा निर्वाचित हुँदा दुईजना वडाध्यक्ष, ९ जना खुल्ला सदस्य, ४ महिला सदस्य र ५ दलित सदस्य गरी २१ जना निर्वाचित भएका छन् ।

२०७८ पुष १९ गते आजभन्दा ४ महिना अघि मात्रै निर्वाचन आयोगमा दर्ता भएको नागरिक उन्मुक्ति पार्टी थारु समुदायबाट तेस्रो ठूलो शक्ति समेत बनेको छ । कांग्रेस र एमालेपछि माओवादी तेस्रो शक्ति बनेको थियो । अब माओवादी चौथो शक्ति बनेको छ ।

रेशम चौधरी जेल जिवन विताईरहेका छन् भने उनको पार्टीलाई श्रीमती रञ्जिता श्रेष्ठ चौधरीले हाँकि रहेकी छिन् ।