दमक, १३ जेठ । यहि जेष्ठ २० र २१ गते संघीय लोकतान्त्रिक राष्ट्रिय मञ्च अन्तर्गत संघीय लिम्बुवान प्रान्तीय मञ्चको पूर्ण बैठक बस्ने भएको छ । झापाको दमकस्थित मारवाडी सेवा समितिको हलमा विहान ११ बजे देखि बैठक शुरु हुने पार्टी स्रोतले जानकारी दिएको छ ।

मञ्चको तेस्रो महाधिवेशन यता यो पहिलो पूर्ण बैठक बस्न लागेको हो । स्थानीय तहको निर्वाचनका कारण समयमा बैठक हुन नसकेको हुँदा लिम्बुवान प्रान्त सहित प्रदेश १ को १४ वटै जिल्लाका प्रतिनिधिहरु बैठकमा सहभागी हुने बताइएको छ । बैठकमा स्थानीय तहमा उम्मेदवार बनेका प्रतिनिधिहरुलाई समेत सम्मान कार्यक्रम राखिएको हुँदा बैठक थप १ दिन लम्बिन सक्ने स्रोतले बताएको छ ।

स्थानीय निर्वाचनसम्बन्धी समीक्षा समेत हुने बैठकमा  मञ्चका संघीय अध्यक्ष कुमार लिङदेन मिराकले उद्घाटन गर्ने जनाइएकाे छ । सो बैठकमा अन्य महत्वपूर्ण राजनैतिक कार्यदिशा र आगामी पार्टीको राजनैतिक एजेण्डा लगायत महत्वपूर्ण विषयमा छलफल बहस गरिने बताइएकाे छ भने उक्त बैठकमा करिब ५ सय जना नेताहरुको सहभागिता रहने बताइएको छ ।

बैठकमा जनवर्गीय संगठन अध्यक्ष, जिल्ला अध्यक्ष, क्षेत्रीय अध्यक्ष, नगर र गाउँपालिका अध्यक्ष समेतलाई पर्यवेक्षकको रुपमा सहभागी गराइने बताएको छ । त्यसैगरी प्रवास समितिहरुबाट नेपाल आउनु भएका नेताहरुलाई पनि बैठकमा समावेश गरिने प्रान्तीय कार्यालय स्रोतले बताएको छ ।