लिम्बुवानखबर, ७ मंसिर । कतारमा भइरहेको २२औं संस्करणको फिफा विश्वकप फुटबलमा अप्रत्यासित नतिजा ल्याउदै जापानले चार पटकको च्याम्पियन जर्मनीलाई २–१ ले स्तब्ध पारेको छ ।

खालिफा इन्टरनेशनल मैदानमा भएको समूह इ को खेलमा एसियाली राष्ट्र जापानले एक गोलले पछि परेको स्थिति उल्टाउँदै जर्मनीमाथि शानदार जित निकालेको हो । जापानले अन्तिम १५ मिनेटमा दुई गोल फर्काउँदै ३ अंक जोडेको हो ।

वैकल्पिक खेलाडीको रुपमा मैदान प्रवेश गरेका रित्सु दोअन र ताकुमा असानोले जापानको लागि गोल गरे । जापान र जर्मनी विश्वकपमा पहिलो पटक भिड्दा नै जापानले जित हात पारेको हो । यसअघि भएका दुई मैत्रीपूर्ण खेलमा भने जर्मनी जापानसँग अपराजित थियो ।

खेलको ३३औं मिनेटमा एल्काए गुन्डागोनको पेनाल्टी गोलमा जर्मनीले पहिले अग्रता लिएको थियो । जापानले उत्कृष्ट पुनारगमन गर्दै ७१औं मिनेटमा मैदान प्रवेश गरेका दोअनले ७५औं मिनेटमा गोल गर्दै खेल १–१ को बराबरीमा ल्याए । त्यसपछि ५७औं मिनेटमा मैदान प्रवेश असानोले ८३औं मिनेटमा को इटाकुराको पासमा उत्कृष्ट गोल गर्दै जापानलाई अग्रता दिलाए थिए ।

विश्वकपको सुरुवाती दुई खेलमा आयोजक कतार र इरान पराजित भए पनि त्यसयता एसियन राष्ट्रले उपाधि दाबेदार ठूला टिमलाई स्तब्ध पारेका छन् । मंगलबार मात्रै साउदी अरेबियाले अर्जेन्टिनालाई २–१ ले पराजित गर्दै सनसनी मच्चाएको थियो ।

बुधबार नै भएको समूह एफको खेलमा क्रोएसियाले मोरोक्कोसँग गोलरहित बराबरी खेल्दै अंक बाढेको छ । चार बर्ष अघि रुसमा भएको विश्वकपमा उत्कृष्ट प्रदर्शन गर्दै फाइनल पुगेको क्रोएसियाले कतारमा भने पहिलो खेलमै अंक बाढ्नु परेको हो ।