फेदाप, २ पुष । किरात याक्थुङ चुम्लुङ अस्ट्रेलियाले फेदाप गाउँपालिका १ सिम्ले स्थित टाहारी निवासी क्यान्सर पीडित चन्द्रकला सम्बाहाङ्फे निङ्लेकुलाई उपचारार्थ सहयोग रकम पठाएको छ । बिरामी रहेकै घरमा पुगेर उक्त सहयोग रकम किरात याक्थुङ चुम्लुङ जिल्ला शाखा तेह्रथुम र फेदाप गाउँपालिका समितिले हस्तान्तरण गरेको हो ।

मानव सेवा नै धर्म हो भन्ने भावनाले प्रेरित प्रवासमा रहने नेपालीहरु आफुले कमाएको केही रकम बचत गरेर दुख, पीडा र रोगिहरुको सहयोग गर्दछन् । यसरी नै प्रवासमा रहेर लिम्बू संस्कार संस्कृति संरक्षणमा लाग्न किरात याक्थुङ चुम्लुङमा संगठित भएका लिम्बुहरुले संस्कार संस्कृति बाहेक मानवीय सहयोग सेवामा समेत सकृय भुमिका निर्वाह गरिरहेका छन ।

लामो समय देखि अस्ट्रेलियालाई कर्म थलो बनाइरहनु भएका मनुराज निङ्लेकुको सक्रियतामा किरात याक्थुङ चुम्लुङ अस्ट्रेलियाले बिरामी चन्द्रकलाको लागि ९३ हजार ८ सय सत्तरी रुपैयाँ रकम उपचारार्थ सहयोग पठाएको हो । बिरामी चन्द्रकला बिगत एक वर्ष देखि घाटीको क्यान्सर पीडित भएर उपचार गर्दै हुनुहुन्छ ।

उहाका छोरा बिजय निङलेकुका अनुसार क्यान्सर किमो उपचार महंगो हुने हुनाले उपचारको लागि समस्या भएको बताउनुहुन्छ । तथापि सक्दो उपचार गरिरहेको र यो सहयोगले आफुहरुलाइ ठूलो राहत महसुस भएको बताउनु भयो । रकम हस्तान्तरण किरात याक्थुङ चुम्लुङ तेह्रथुम अध्यक्ष सेसेहाङ हुक्पा चोङबाङ जिल्ला सदस्यद्वय लोक ब. सिंगक, मोहनसिं सिगक र फेदाप गाउशाखा अध्यक्ष गंगा कुरुम्बाङको उपस्थितिमा गरिएको थियो ।