काठमाडौं, १७ असार ।  प्रदेश १ मा हिक्मत कार्की नेतृत्वको नेकपा एमालेको सरकार ढलेसँगै नयाँ सरकार गठनको प्रक्रिया सुरु भएको छ । शुक्रबार विश्वासकाे मत गुमाएसँगै कार्की नेतृत्वको सरकार ढलेकाे हाे ।

गठबन्धन दल नयाँ सरकार गठनका लागि छलफलमा जुटेको छन् । प्रदेश प्रमुखले सरकार गठनका लागि आह्वान गरे लगत्तै गठबन्धन दलले दाबी गर्ने जनाएको छ ।

शुक्रबार भएको विश्वासको मत विभाजनका क्रममा कार्कीले प्रस्ताव गरेको विश्वासको मत सम्बन्धी प्रस्तावमा ४६ मत खसेपछि कार्की सरकार ढलेको हो ।

एक नेताका अनुसार नेकपा माओवादी केन्द्र प्रदेश १ संसदीय दलका नेता इन्द्रबहादुर आङ्बोको नेतृत्वमा सरकार गठनका लागि गठबन्धनले तयारी गरेको छ । ति नेताले भने– ‘नयाँ सरकार गठनका सन्दर्भमा गठबन्धन दलबीच आधारभूत रूपमा सहमति भएको छ । अहिलेकै सन्दर्भमा आङ्बोजीको नेतृत्वमा सरकार गठन गर्ने आधारभूत सहमति जुटेको छ । तर, यो नै हाे भन्ने होइन ।’

आङ्बोको नेतृत्वमा सरकार गठन हुने अवस्थामा मुख्यमन्त्री कार्कीले विश्वासको मत माग्दा तटस्थ बसेको जनता समााजवादी पार्टी (जसपा)ले समर्थन गर्ने जनाएको छ । जसपाका केन्द्रीय सदस्य लाेकसागर साम्बाका अनुसार काेशी खारेजी र पुनः नामाङकनकाे लागी जुन पक्षले सहमती गर्छ उसलाइ समर्थन गर्ने वताए ।

त्यसै गरी, मुख्यमन्त्रीमा आलोपालो हुने अवस्थामा राष्ट्रिय प्रजातन्त्र पार्टीले समेत समर्थन गर्न सक्ने स्राेतले जनाएकाे छ ।