दमक, ६ पुस । झापाको कमल गाउँपालिका- ५ पाडाजुंगीस्थित आदिवासी रंगशालामा आयोजित चासोक तङनाम (न्वागी पूजा) को समीक्षासहित आयव्यय सार्वजनिक गरिएको छ ।
किरात याक्थुङ चुम्लुङ दमक र कमल शाखाको शुक्रबार किरात भवनमा बसेको संयुक्त समीक्षा बैठकले गत मंसिर ३० गते सम्पन्न चासोक तङनामको यथार्थ आयव्यय सार्वजनिक गरिएको चुम्लुङ दमकका अध्यक्ष देवेन्द्र मावोहाङ चेम्जोङले बताएका छन् ।
उनका अनुसार कार्यक्रम सम्पन्न गर्न स्टेज,प्रचार,कलाकारहरुको पारिश्रमिक लगायत गरि कुल ३ लाख ६५ हजार खर्च भएको छ । खर्च मध्ये आधा-आधा रकम दुवै संस्थाले व्यहोर्ने समेत निर्णय भएको उनले जनाए । कार्यक्रम सफल बनाउन स्वदेश तथा विदेशमा बस्दैआएका लिम्बू -याक्थुङहरुले स्वेच्छिक रुपमा सहयोग पुरयाँएका थिए ।
विगतका वर्षझै यसवर्ष पनि दुवै संस्थाले चासोक तङनाम भव्य रुपले मनाएका थिए । त्यस दिन मात्र कार्यक्रममा आउने सहभागिहरुबाट ५० हजार ७ सय ५० रुपैया सहयोग प्राप्त भएको चुम्लुङ कमलका अध्यक्ष दिवस सम्बाहाम्फेले बताए ।
चुम्लुङका संघीय सचिव यासेली योङहाङको प्रमुख आतिथ्यतामा सम्पन्न भएको चासोक विशेष सांस्कृतिक कार्यक्रममा लिम्बू जातिका गीत,नृत्य प्रस्तुत गरिनुका साथै कार्यक्रम सफल बनाउन सहयोग पुरयाँउने दाताहरुलाई प्रंशसापत्र समेत वितरण गरिएको थियो । बैठकले चासोक विशेष कार्यक्रम सफल बनाउने सहयोग पुरयाँउने दाता, लिम्बू समुदाय अग्रज, सर्वसाधारण ,कलाकारहरुलाई धन्यवाद समेत दिने निर्णय गरिएको चुम्लुङ दमकका अध्यक्ष चेम्जोङले बताए ।