ललितपुर, २३ चैत्र । वृहत् नागरिक आन्दोलनले वायु प्रदूषणको विषयमा सरकारलाई सम्झाउनुपर्ने अवस्था आउनु लज्जास्पद भएको बताएको छ ।

पछिल्लो समय काठमाडौं उपत्यकासहित देशभर बढेको प्रदूषण रोक लगाउने कामहरू तत्काल गर्न जरुरी रहेको भन्दै शनिबार एक विज्ञप्ति जारी गर्दै वायु प्रदूषणका गतिविधि निरुत्साहित गर्न गराउन आग्रह गरेको हाे ।

अत्यधिक वायु प्रदूषण देखिएका क्षेत्र वरपर रहेका बढी प्रदूषणको भार थप्ने देखिएका कलकारखाना केही दिनलाई बन्द गर्ने, प्रदूषित हावा उत्सर्जनमा बढी जिम्मेवार सवारीसाधनहरुको आवागमन नियन्त्रण गर्ने, सवारीसाधनमा आवश्यकता अनुसार जोरबिजोर प्रणाली लागू गर्ने लगायतका काम गर्न वृहत् नागरिक आन्दोलनले सुझाव दिएको छ ।

वृहत् नागरिक आन्दोलनले आम नागरिकको स्वास्थ्यप्रतिको असंवेनदशीलता, अकर्मण्यता र प्रतिक्रियाहीनताप्रति आपत्ति जनाएको छ ।

काठमाडौं उपत्यकाका प्रमुख पालिका र सम्बन्धित प्रदेश सरकारहरूमा कुनै हतार, कुनै जागरुकता नदेखिनु अती क्षोभ र आश्चर्यको विषय भएको विज्ञप्तिमा उल्लेख गरेकाे छ ।

‘अभूतपूर्व राष्ट्रिय वातावरणीय र जनस्वास्थ्य संकटका बेलामा कुम्भकर्ण निद्रामा सुत्ने छुट जनप्रतिनिधि र सरकारहरूलाई छैन र सबैलाई आआफ्ना जिम्मेवारी बहन गर्न बृहत् नागरिक आन्दोलन जोडदार आह्वान गर्दछ,’ नागरिक आन्दोलनले जारी गरेको विज्ञप्तिमा उल्लेख छ ।

विज्ञप्ति हेर्नुहाेस् ः