ललितपुर, २३ चैत्र । मुक्कुमलुङ ताङसेःप चुम्भो र मुक्कुमलुङ संरक्षण अन्तरदलीय संघर्ष समितिले चैत २५ गते देखि गर्ने भनिएको अनिश्चितकालीन यातायात बन्द स्थगन भएको जनाएको छ । प्रदेश १ को एशियन हाईवेबाट उत्तरी खण्ड, मेचि हाईवे, तम्मर करिडोर, धनकुटे रोडलगायत सबै सडक बन्द गर्ने कार्यक्रम स्थगन भएको विज्ञिप्त मार्फत जनाएको हो ।

“मुक्कुमलुङ संस्कृति, सम्पदा, सभ्यता र मुन्धुमीस्थलमाथिको सांस्कृतिक संहार cultural Genocide, गोलि काण्ड, राज्यको मानवता विरोधी फुङ्लिङ काण्ड विरुद्द र केबलकार खारेजीको लागि” यातायात बन्दको कार्यक्रम घोषणा गरेको थियो । संघर्ष समितिले विभिन्न चरणबद्ध कार्यक्रमहरु निरन्तर गरिरहेको जनाएको छ ।

गत चैत्र १३ गते सर्वोच्च अदालतले केवलकार निर्माणको कामलाई यथास्थितिमा राख्नु भन्ने अल्पकालिन अन्तरिम आदेश जारी गरेको र यस विषयको गाम्भिर्यतालाई मनन गर्दै निर्माण पक्ष र आन्दोलनरत पक्ष बिच २६ चैत्रमा पेशी तोक्ने आदेश दिएपछि यस विषयलाई मध्यनजर गर्दै तत्काललाई पूर्व निर्धारित कार्यक्रम स्थगन गरेको शुक्रबार एक विज्ञप्ति जारि गर्दै संघर्ष समितिले जनाएको छ ।

आन्दोलनरत पक्षका नेतृत्वहरु कुनैपनि हालतमा पछि नसर्ने जस्तोसुकै निर्णय आएपनि केवलकार निर्माण गर्न नदिने पक्षमा स्पष्ट रहेको वताउँछन् । बरु हामी मर्छौ तर केवलकार निर्माण गन्न दिन्नां उनीहरुको जिकीर रहेको छ ।