ललितपुर, १७ वैशाख । नागरिक उन्मुक्ति पार्टीका संरक्षक रेशम चौधरी रिहा भएका छन् । सर्वोच्च अदालतले डिल्ली बजार कारागारलाई तुरुन्त थुनामुक्त गर्न पत्र पठाएपछि उनी रिहा भएका हुन् ।

आज (बुधबार) उनलाई प्रज्ञा प्रतिष्ठानमा डा. सिके राउतको जनमत पार्टीसँग एकता घोषणा कार्यक्रम भइरहेका बेला सादा पोशाकका प्रहरीले पक्राउ गरेको थियो । सर्वोच्चको शंकास्पद् पत्रका आधारमा प्रहरीले पक्राउ गरेको थियो ।

सर्वोच्चका शाखा अधिकृत महिमानसिंह विष्टले आफू अनुकूल पत्र पठाएपछि रेशम चौधरी पक्राउ परेका थिए । सर्वोच्च अदालतले उक्त पत्र आधिकारिक नभएको स्पष्ट पारेको थियो । उक्त पत्र नक्कली भएपछि सर्वोच्चले अर्को पत्र जारी गरेर डिल्ली बजार कारागारलाई थुनामुक्त गर्न निर्देशन दिएको थियो ।

चौधरी पक्राउ परेसँगै आज घोषणा गरिएको नाउपा र जनमत पार्टी एकता कार्यक्रम हाललाई स्थगित गरिएको जनमत पार्टी अध्यक्ष डा. सिके राउतले बताउनु भयो । त्यसैगरी डिल्लीबजार कारागार अगाडि नाउपा र जनमतका नेता तथा कार्यकर्ताहरुले नारावाजी गर्दै संरक्षक चौधरीलाई रिहाईको माग गर्दै नाराबाजी गरेका छन् ।