• बसन्त राज सुब्बा

कमल, ११ भदौं/ झापाको कमल गाउँपालिकास्थित केर्खा बजारमा हिन्दु नेपाली महिलाहरुको हरितालिका तीज भव्य मनाएको छ । मंगलबार समावेसी महिला शसक्तिकरण केन्द्रको आयोजनामा हरके बर्ष मनाउदै आएको तिज विशेष कार्यक्रम यस वर्ष पनि शुभकामना आदान प्रदानका साथै नाचगान गर्दै मनाइएको हो ।

तिज हरेक वर्ष भाद्र शुक्ल तृतीयाका दिन तिज मनाउने गरिन्छ । तिजको अघिल्लो रात द्वितियाको दिन दर खाने गरिन्छ । तिजको दिन व्रत बस्ने परम्परा रहेको छ । चौथीका दिन स्नान गरी ब्रतको पारण खाने गरिन्छ भने तिजको तेस्रो दिन अर्थात ऋषिपञ्चमीको दिन व्रतालु महिलाहरूले ३६५ वटा दतिवनले दाँत माझेर माटो लेपान गरी स्नान गर्छन् ।

अपमार्ग लेपनले छालामा हुने चिलाउने हटाउने विश्वास छ । पञ्चमीको दिन अरुन्धतीसहित कश्यप, अत्रि, भारद्वाज, विश्वामित्र, गौतम, जमदिग्न तथा वशिष्ठ ऋषिको पूजाआजा गरी हलोले नजोतेको अन्नको भात र एक सुइरे भएर उम्रने कर्कलोको तरकारी खाइन्छ । त्यो दिन श्रीमानले पकाएको खाना खाए आपसी आत्मीयता एवम् सद्भाव बढ्ने विश्वास पनि गरिन्छ ।

केन्द्रकी अध्यक्ष पुर्ण कुमारी देवानको अध्यक्षता तथा कमल गाउँपालिकाका उपाध्यक्ष प्रमिला न्यौपाने तिवारीको प्रमुख अतिथ्यतामा भएको तिज विशेष कार्यक्रममा विशिष्ट अतिथि कमल वार्ड ३ अध्यक्ष अग्नि प्रसाद कोइराला त्यसैगरी विभिन्न संघ सस्थाका प्रमुख तथा प्रतिनिधी, किर्तन मण्डलीका प्रतिनिधी पत्रकार स्थानीयबासी लगायतको उपस्थितीमा तिज विशेष कार्यक्रम मनाएको हो ।

प्रमुख अतिथि कमल गा.पा उपाध्यक्ष प्रर्मिला तिवारीले हरेक वर्ष झैँ यस बर्ष पनि यो पर्व हर्सोल्लासका साथ सम्पन्न गरेकोमा संस्थालाई धन्यवाद दिएकी थिइन् भने पालिकाको तर्फबाट शुभकामना समेत दिएकी थिइन् ।

केन्द्रकी सहसचिव देवि माया नेपालले सन्चालन गरेको कार्यक्रममा सस्थाकी सदस्य सृजना ढकालले उपस्थित दिदीबहिनीहरुलाई स्वागत गर्नु भएको थियो ।